Nytt tilskot i bladstova
Ekstra merksame lesarar har kanskje lagt merke til eit nytt namn som dukka opp i HF den siste veka.
Det er ikkje meir enn ei god veke sidan lokalavisa fekk tips om det som skulle vera ein fornuftig kar på leit etter meir å gjera. «Han verkar oppegåande», var kommentaren frå bladstyrar Sigbjørn Linga etter den fyrste praten. Onsdag ettermiddag publiserte Jostein Fagerland (28) frå Karmøy si fyrste sak.
HF har hatt problem med bemanninga sidan i sommar, noko som har ført til stort arbeidspress og tøffe prioriteringar, seier Linga.
– Difor er det veldig kjekt at Fagerland kom som manna frå himmelen.
– Bytte yrke
28-åringen er utdanna lærar i botn og har ein masteri historie, men valde å byta yrke etter kort tid. Hausten i fjor var han hjå Nynorsk Avissenter i Førde – eit slags halvtårskurs i journalistikk.
– Det var kjempekjekt. Me jobba som journalistar i lokalavisa Firda, berre med litt ekstra opplæring og tilsyn. Det var ei skikkeleg god innføring i yrket, fortel Fagerland.
– Kva var det med journalistyrket som fengde deg?
– Eg er ein nysgjerrig type. Eg likar å finna ut av ting som ikkje mange veit – ting som ein i utgangspunktet kanskje ikkje skal finna ut av, om du skjønar?
– Du er glad i å grava?
– Ja! Det triggar meg.
Andre stoffområde kan også vera interessante å skriva om, men opposisjonar og konflikt er alltid kjekt, slår han fast.
Ei annleis avis?
Sidan perioden hjå Nynorsk Avissenter har karmøybuen vore innom Bergens Tidende, både i praksis, eit vikariat og som ringjevikar. Han har òg vore innom lokalavisa Smaalenenes Avis i Indre Østfold, og skrive frilans for sportsmagasinet Fri Flyt. Fri Flyt skriv mellom anna om friluftsliv, skisport, klatring og vannsport. Det høver bra med tanke på fritidsinteressene til Fagerland.
– Det går mykje i friluftsliv og klatring. Buldring når det ikkje er snø, og ski når det er snø, fortel han.
Onsdag morgon klokka åtte byrja fyrste arbeidsdag. Så langt har avisa gjeve eit godt inntrykk, seier Fagerland. Noko av det fyrste han la merke til, var at det vert teke gode bilete. Det synest han er bra.
– Elles verkar Hordaland Folkeblad som ein nøktern type avis som kanskje gjer ting litt annleis enn mange andre lokalaviser. Det synest eg er fint, seier Fagerland.
– Det treng HF
Det er kjekt å få inn ein med røynsle frå fleire lokalaviser og frå «storsusaren» Bergens Tidende, synest redaktøren.
– Så langt verkar Jostein å vera både triveleg og kvikk, og ikkje minst har han varsla interesse for å driva kritisk journalistikk. Det treng HF meir av, seier Linga.
Ikkje minst på grunn av hans bakgrunn frå Amedia-aviser reknar Linga i tillegg med at Fagerland kan læra redaksjonen ein del om korleis ein skal få det til å rykkja i klikkefingeren til lesarane ved å spissa sakene og prioritera det som sel.
– Så får me sjå om me høyrer på det øyra.
