Nytt styre for seniorar

Kvam Senioruniversitet heldt nyleg årsmøte i Kunsthuset Kabuso i Øystese. Det opplyser organisasjonen i eit presseskriv.

I møtet heldt Ingvild Bryn i NRK føredrag om arbeidet i Dagsrevyen. Ho stilte opp på kort varsel etter at NRK-journalist Roger Severin Bruland melde forfall på grunn av sjukdom.

Tidlegare leiar i styret, Mali Grete N. Aksnes, gjekk av. Det gjorde også Bjørg Døsseland. Ny leiar er Hans Petter Bugge. I det nye styret sit Bugge, Bente Mo, Hans Edvard Rolle Olsen, Trygve Fonneland, Chris Aksnes og Kristin Kollsgård Børve. Varalemar er Arvid Auganæs, Erna Tveitnes og Eli Mo.

Organisasjonen vart stifta i 2000 og har som mål å tilby læring og kunnskap for dei i «moden alder». Det vert mellom anna skipa til månadlege føredrag, årleg konsert og tur på våren. Dei komande månadene vil Dag Steinfeld, Astrid Sverresdottir Dypvik og Sylfest Lomheim vera blant føredragshaldarane, går det fram i skrivet.