Nytt regelverk kan gjera mottinglager for små
Regjeringa har sendt eit forslag om nytt gjødselregelverk på høyring. For nokre bønder kan det bety at gyllelageret må utvidast.
Fosfornivået i jord og vatn har stige i mange jordbruksområde. Håpet er at det nye regelverket skal snu utviklinga, seier landbruks- og matminister Geir Pollestad (Sp) i ein artikkel på nettstaden regjeringen.no. Alle typar gjødsel inneheld fosfor, som er negativt for miljøet.
I lovforslaget vert det mellom anna føreslege å redusera perioden det er lov å spreia organisk gjødsel i, frå 15. februar til 1. november i dag til 1. mars til 1. september etter ei eventuell endring.
Medan det tidlegare var lovleg å spreia 3,5 kilo fosfor frå husdyrgjødsel per dekar, foreslår regjeringa å redusera grensa til 2,3 kilo. Grensa skal gjelda for alle typar gjødsel.
Bøndene kan velja om dei vil følgja fosforgrensa eller «spreia i balanse». Bønder som vel det siste, kan bruka meir fosfor dersom dei kan dokumentera at avlingane tek til seg all fosforen.
– Skal klara dette
Guro Stuve, leiar i Vikøy og Øystese Bondelag, og Åmund Kolltveit, leiar i Strandebarm–Tørvikbygd Bondelag, er samde om at det er positivt med tiltak som reduserer fosforbruken, sjølv om dei ikkje trur overgjødsling er eit stort problem i Kvam. Begge er samde om at forslaget truleg ikkje vil få store konsekvensar for bøndene i Kvam.
– Eg trur me skal klara å innfri desse krava. Det kan vera nokre bønder må gjødsla litt mindre, noko som kan føra til mindre avlingar, seier Kolltveit.
Små gjødsellager kan verta eit problem.
– Nokre av våre medlemer har små område dei skal gjødsla. Dei kan få eit problem med lagerkapasitet når det vert reduserte gjødseltider, seier Stuve.
– Fleire bønder må truleg utvida gjødsellagera. Det kan vera positivt med meir lagerplass, men det kostar pengar, seier Kolltveit.
– Bør endrast
Eitt av forslaga i det nye regelverket reagerer både Kolltveit og Stuve på: Regjeringa føreslår at det berre skal vera lov å gjødsla i område som er godkjende som innmarksbeite.
– Har ein til dømes eit hogstområde ein vil gjera om til dyrka mark, vil ein få eit problem. Området vil ikkje verta godkjent som innmarksbeite før det er grønt og fint, og du får ikkje eit område grønt og fint utan å gjødsla, seier Kolltveit.
Begge dei lokale laga har oppmoda Norges Bondelag om å levera inn eit høyringsinnspel og be om endring av punktet.
Regjeringa sende forslaget på høyring 20. mars. Høyringsfristen er 20. juni.
