Nytt driftsselskap er stifta
Etter ein mørk seinsommar og haust byrjar butikken i Herand no å sjå lys i tunnelen.
– Me har fått registrert eit nytt driftsselskap. Det vart godkjent på onsdag, fortel Gunnar Dalseth i Herand Bygdelag.
Selskapet heiter Herand Handel AS og er starta med ein minimumskapital og eit minimumsstyre, fortel han. I styret sit førebels Dalseth som styreleiar, Ole Gisle Vassel som nestleiar, og Kari Anne Guldbrandsen og Angunn Handegard Trå som styremedlemer. Så snart det er henta inn meir kapital, vert det valt eit nytt styre, seier Dalseth.
Planen at Emor AS, som er hovudaksjonær i Herand Landhandleri AS, skal prøva å kjøpa ut aksjane til dei lokale investorane. Emor AS og eigar Ove-Henning Bjørsvik vil då få full kontroll over det eksisterande driftsselskapet. Vidare er planen at alt av inventar og utstyr skal seljast til Herand Handel.
No jobbar styret med å få med folk til både å driva butikken og til å bidra med kapital.
– Akkurat no går det litt seint, men eg reknar med at me i løpet av nokre veker veit langt meir, seier Dalseth.
Ein god del pengar har kome inn allereie, fortel han. Bjørsvik fortel at han vil driva butikken som vanleg fram til kapitalen er på plass.
