Nytt aktivitetstilbod til Øystese
Den sosiale entreprenøren Drive Norge har valt ut 5.–7. trinn ved Øystese skule til å delta i aktivitetsprogrammet WePlay.
Det går fram av ei pressemelding frå verksemda, som held til på Ler i Trøndelag.
Éin skule er vald ut i kvart fylke. Gjennom programmet, som vil gå føre seg etter skuletid éin gong i veka fram til sommarferien, legg WePlay til rette for at born skal oppleva å verta inkluderte, utfalda seg i fysisk aktivitet og ha det kjekt saman. Alle er velkomne, uavhengig av bakgrunn, og tilbodet er gratis. Programmet vert gjennomført av lokale såkalla Drive-coachar, og fokus vil vera på leik, samspel, rørsle og glede.
– Me har ofte sett at borna byggjer venskap på tvers av alder, kultur og kjønn. Me ynskjer at dei skal kjenna på meistring gjennom leiken, seier aktivitets- og fagansvarleg Ida Alstad i pressemeldinga.
Det er femte året Drive Norge tilbyr aktivitetstilbodet. Den ideelle organisasjonen vart nyleg tildelt 2,7 millionar kroner frå Lotteri- og stiftingstilsynet.
WePlay har 11 tilsette leiarar og over 100 lokale DRIVE-coachar i Noreg.
