Nygård høgast på Frp-lista
Frode Nygård kan få 12.-plassen på fylkestingslista til Vestland Frp.
I alle fall er det plasseringa kvemmingen har på listeframlegget frå nominasjonsnemnda i fylkeslaget, opplyser varaordføraren i Kvam i ei pressemelding. Frp har i dag seks medlemer i fylkestinget.
12.-plass hadde Nygård også på stortingslista til Frp i valet i 2021.
Partifellane i Kvam Frp, Gry M. Kyrkjeeide og Gunnar Kvandal, står på høvesvis 35.-plass og 39.-plass i framlegget, som nominasjonsmøtet drøftar 26. november. Marianne Solheim på 45.-plass er den einaste ullensvangaren.
På toppen av lista står Terje Søviknes frå Bjørnafjorden og Sigbjørn Framnes frå Stord.
– Frp tek sikte på å gjera eit betre val enn i 2019 og ynskjer å koma i posisjon i Vestland fylkeskommune. Denne lista har eit mannskap som vil kunne driva ein god valkamp og gjera ein solid jobb for vestlendingane i fylkestinget dei neste fire åra, seier Helge André Njåstad, politisk nestleiar i Vestland Frp og leiar i nominasjonsnemnda.
