Nye ruter frå måndag
Frå og med 1. mai er sommarruta og ekstraferja på plass i ferjesambandet Tørvikbygd–Jondal.
Ekstraferja skal vera i gang frå klokka 10.20 måndag morgon. Fyrste tur går frå Tørvikbygd, syner ruteoppsettet til Skyss.
Vidare vert det avgang både «ti på heil» og «ti på halv» frå begge sider gjennom dagen. Dei ekstra turane held fram til ulike tidspunkt gjennom veka. Måndag går den siste ekstraruta klokka 18.50 frå Jondal. Tysdag til torsdag held ho fram til klokka 19.50, og fredag og sundag til klokka 20.50. Sommarrutene gjeld fram til 31. august.
Reserveferja som gjev MF «Samlafjord» lag i sommar, er MF «Gulen». Ho tek 90 personbileiningar (PBE) og 295 passasjerar, ifylgje reiarlaget Fjord1 AS. Planen var tidlegare å nytta MF «Sogn».
Medlemene i hovudutval for samferdsle vitja Ullensvang onsdag. Dei fekk vita at prisen for ferja etter forhandlingar vert om lag éin million kroner billegare enn dei varsla tjue millionane.
