Nye koronaråd: munnbind på bussen og stopp i vaksenidrett

Kvam herad rår frå private festar, fritidsaktivitetar for vaksne, pendling til Bergen og kollektivreising utan munnbind.

Måndag kunngjorde Kvam herad ei rekke råd til innbyggarane for å hindra koronasmitte.

Ordførar Torgeir Næss (Ap) understreker at ein er klar til å innføra strengare reglar dersom smittesituasjonen i Kvam endrar seg.

– Kvam har førebels lite smitte. Slik vil me at det skal halda fram, seier han.

Inntil vidare er råda som følger:

• Arrangement vert ikkje gjennomførte med meir enn 20 deltakarar, med mindre det er fastmonterte sete og mogleg å følga generelle smittevernråd. Kvam herad rår òg frå å arrangera private festar. For gravferd, bryllaup og dåp gjeld nasjonale reglar.

• 14 dagars pause i fritidsaktivitetar for vaksne. Aktivitetar for born kan halda fram, med unntak av turneringar og kampar.

• Folk som reiser med kollektivtransport til Bergen og omegnskommunane, bør bruka munnbind.

• Pendlar du til jobb til eller frå Bergen og omegn og har høve til å ha det, bør du ha heimekontor.