Nye Hessvik er råka av virus

Det er påvist infeksiøs lakseanemi ved oppdrettslokaliteten Nye Hessvik i Jondal.

Håkon Norheim
Journalist
Publisert Sist oppdatert

Bremnes Seashore AS og AS Bolaks driv med oppdrett av laks her.

Alle som ferdast i området og driv aktivitet knytt til fiskeoppdrett, må visa naudsynt aktsemd, slik at spreiing av eventuell sjukdom kan unngåast, skriv Mattilsynet i ei kunngjering.

Bremnes Seashore varsla tilsynet om mistanke om infeksiøs lakseanemi (ILA) 27. januar. Mattilsynet tok prøvar av fisk 31. januar. Tilsynet stadfesta diagnosen 8. februar på bakgrunn av inspeksjon av fisken, teikn til sjukdom og analyseresultat frå Veterinærinstituttet.

For å avgrensa smittespreiinga, er lokaliteten pålagd restriksjonar, mellom anna forbod mot flytting av fisk utan særskilt løyve, ifylgje Mattilsynet. Utslakting for å tøma lokaliteten for fisk er sett i verk. Slakting og destruksjon av fisk startar i merdane der det er påvist smitta fisk.

Ein opprettar ei restriksjonssone for å førebyggja, avgrensa og kjempa imot ILA. Ei restriksjonssone inneheld ei vernesone og ei overvakingssone, og vil medføra restriksjonar på mellom anna trafikk i havområdet. Restriksjonssona må forventast å vera på om lag ei til to mil frå det råka anlegget, opplyser Mattilsynet.

Infeksiøs lakseanemi (ILA)

• ILA er ein alvorleg, smittsam virussjukdom hjå laks.

• Mistanke om eller påvising av ILA skal straks meldast til Mattilsynet.

• ILA skuldast eit virus. Det er ufarleg for menneske.

• Regnbogeaure kan verta smitta, men utviklar vanlegvis ikkje symptom.

• Lokalitetar med ILA skal slakta og destruera laksen og reingjera og desinfisera anlegget, før det vert lagt brakk i minimum tre månader.

• Mistanke om ILA gjer at det ikkje kan eksporterast laks til Kina eller laksefisk til Australia. New Zealand kan ikkje ta imot laksefisk med påvist ILA

Kjelde: Mattilsynet

fiskeri og havbruk plantar og dyr nyhende natur og miljø mat og næringsmiddel jondal økonomi bremnes seashore as
Laga med Labrador CMS