Ny veg stengd av skred

Vegen er stengd på strekninga mellom Bøen og Vikeholmane.

Det melde Statens vegvesen vest onsdag. Stenginga gjaldt i fyrste omgang til klokka 12 torsdag. Vegen er framleis stengd, og skal vurderast på nytt klokka 18.

Frå før er fylkesveg 49 stengd ved Nordrepollen. Også her vart det gjort ei ny vurdering klokka 12 torsdag. Då vart det meldt at ny vurdering skal gjerast klokka 15. I tillegg er mellom anna riksveg 13 stengd som fylgje av skred og flaum.

Kommunen har plassert ein ambulanse i Jondal fram til torsdag, melder den kommunale kriseleiinga i ei pressemelding.

Også i Kvam er det helst blautt, men her er det enno ikkje meldt om større hendingar. På fylkesveg 48 ved Mundheim gjekk eit jordskred som sperra eitt felt onsdag, varsla vegvesenet.

Vegen mellom Porsmyr og Fyksesundbrua, fylkesveg 5122, vart stengt frå onsdag klokka 23.10. Ny vurdering skal gjerast torsdag klokka 13.

I Øystese vart det onsdag meldt om mykje vatn på fylkesveg 79 mellom sentrum og Stronde.

– Me ber alle om å vurdera om dei verkeleg må ut på vegen. Situasjonen er uavklara i heile Vestland. Terrenget er vassmetta, det regnar framleis og flaumtoppen i vassdraga er ikkje nådd. Det er mykje overvatn på vegane. Det er fare for alle typar skred. Me ber innstendig alle om å vurdera om dei må ut på vegen i kveld og i natt, seier avdelingsdirektør Svenn Finden i avdelinga Drift og vedlikehald Vest Statens vegvesen i ei pressemelding onsdag kveld.