Ny stasjon skal betra gjenvinning: – Det vert lettare å leva grønt og billeg

Ordføraren i Kvam var ein av fleire prominente gjester som var til stades på opninga av den nye, moderne gjenvinningsstasjonen i Norheimsund onsdag.

Grønt og berekraftig

Stasjonen i Sandvenhagen vart feira med talar, musikalske innslag, konkurranse i mjølkekartongbretting, bollar og brus, og dei frammøtte fekk moglegheita til å gjera seg kjende i det nye gjenvinningsområdet.

På vegner av heradet takka Næss alle som hadde teke del i prosjektet. Han meiner at løysingane som er nytta på stasjonen, er med på å gjera handtering av avfall meir effektiv, og at ho vil bidra til at fleire ressursar vert frigjorde. Han vonar at dei tilsette vil få høve til å yta betre rettleiing til dei som kjem. Gjenvinninga vil verta betre og drifta meir berekraftig, ifylgje ordføraren.

– Stasjonen opnar døra til ei framtid der sirkulærøkonomi vert meir sentral. Med slike løysingar vert det lettare for oss å leva grønt og billeg, sa ordføraren.

Harry Skar var ein av dei som nytta høvet til å levera frå seg ymse avfall på opningsdagen. Då han snakka med lokalavisa, hadde han enno ikkje lasta ned appen som skal nyttast til registrering og rettleiing. Det stoppa ikkje Skar, som utan problem fekk levera frå seg det han hadde i tilhengjaren. Fyrsteinntrykket av den nye stasjonen var godt, ifylgje Skar.

– Her er det både romleg, ryddig og fint, seier han.

– Sorter og bruk om att!

Konsernsjef Borghild Lekve i Bir meiner gjenvinningsstasjonane er viktige for å auka omfanget av ombruk og materialgjenvinning og å redusera den samla miljøbelastinga.

Lekve vonar at tilbodet vert nyttig både for fastbuande og hyttefolk, og at stasjonen vil bidra til at kundane vil verta flinke til å sortera. I talen oppfordra ho alle til å nytta seg av brukthallen i «gratissona».

– Kanskje er det som er bos for deg, verdfullt for meg, sa Lekve.

Ifylgje konsernsjefen er gjenvinningsstasjonen, som også er ein pilotstasjon, viktig på tre område: Ein får testa elektronisk kundeidentifisering, ein går frå betaling registrert i volum til registrering i vekt, og det er lagt til rette for eit funksjonelt køyremønster. På stasjonen vil kundane fyrst koma inn i ei gratissone der dei kan levera inn gjenstandar til ombruk og ymse farleg avfall utan å betala, før dei anten kan køyra ut att eller køyra inn i ei betalingssone. Mellom kvar av sonene vert køyretøya vegne.

– Eg vonar at stasjonen vil verta flittig brukt av alle! sa Lekve.