– Ny rekord med god margin

Ordren var på ti bilar, men den tiande bilen vart seinka. For verksemda er salet ny rekord.

– Den førre rekorden var på fem bilar, så dette er ny rekord med god margin. Det er sjølvsagt kjekt å få ein så stor ordre. Me tek det som ei tillitserklæring, fortel Svein Hogne Børven, dagleg leiar i verksemda.

– Trong fornying

Bilane kom med ein biltransport for eit par veker sidan. Den siste tida har dei tilsette i Toyota Norheimsund jobba på spreng for å gjera dei klare til levering.

– Folk har bretta opp ermene, og det har vorte litt overtid dei siste dagane, seier Børven.

Kjøpar er Tecno VVS AS. Dagleg leiar Erlend Flotve fortel at verksemda trong å fornya delar av den om lag femti køyretøy store bilparken.

– Dei siste åra har verksemda og bilparken vakse så mykje at me ikkje har rokke å byta ut gamle bilar. Med dette grepet byter me ut om lag tjue prosent av bilane, seier han.

Varebilane skal brukast av røyrleggjarane og ventilasjonsmontørane til verksemda. Tre av bilane skal til avdelinga på Voss. Resten blir i Kvam.

– Kort veg

Flotve fortel at Tecno VVS valde Toyota Norheimsund fordi verksemda ligg i nærleiken av avdelinga i Norheimsund.

– Det vert kort veg når bilane skal på sørvis, og me er nøgde med den sørvisen me har fått her tidlegare, seier han.

Verksemda valde dieselbilar og ikkje elektriske køyretøy denne gongen.

– Me har mange elektriske bilar og vel elektrisk når me kan. Desse bilane skal brukast til langturar i heile Hordaland. På langturar kan det vera vanskeleg å koma i mål med elbilar, i alle fall på vinterstid, seier Flotve.

Verdien på kjøpet skal ifølgje partane vera på om lag sju millionar kroner.