Ny rekord for breførarlaget

Det seier Åsmund Bakke, som er dagleg leiar og største eigar i Folgefonni Breførarlag AS.

Selskapet har hatt fire–fem tusen gjester så langt i år, og sesongen er ikkje over før vinteren kjem til Folgefonna ein gong i oktober. Bakke trur omsetninga vil enda på kring fem–seks millionar kroner i 2022.

– 41 prosent vekst frå i fjor

– Det har vore ein kjempeflott sesong. Me har hatt ein relativt fuktig og kald sommar på breen, kanskje den fuktigaste så langt sidan me starta i 1994. Trass det har me hatt enormt med tingingar, og har vore fullbooka store delar av sommaren. Det er fyrst no på hausten at me har noko ledig kapasitet igjen, seier han.

Turoperatørar tilbake

Under pandemien hadde selskapet ingen utanlandske gjester, men dei er no komne tilbake for fullt. Mange kjem frå Nederland via ei ny ferjerute til Bergen, og mange har med seg bil. Det har også kome fleire tyskarar, men langt færre nordmenn.

Også turoperatørane har kome tilbake. I 2020 og 2021 hadde breførarverksemda ingen gjester som kom via desse. No sel verksemdene noregsturar der breopplevinga er ein del av pakken. I 2019 utgjorde dei halvparten av omsetninga. I år utgjer dei kanskje 30 prosent av omsetninga, fortel Bakke.

– Me ser ei dreiing i alder på kundane våre. 25 til 45 år har vorte det vanlegaste alderssegmentet, ei litt yngre kundegruppe enn før. Det trur eg heng saman med at Visit Hardangerfjord har gjort ein super jobb med marknadsføring mot dette segmentet. Det hjelpte oss gjennom og ikkje minst etter pandemien. Me er ein liten aktør som er svært avhengig av eit godt fungerande destinasjonsselskap, seier Bakke.

Tilpassar seg ruter

Under pandemien brukte breførarlaget tida godt til vidareutvikling av dei ulike turane og justering av nettsidene. I år har ein ikkje tilbode noko nytt.

Under pandemien tilpassa selskapet ein eigen bretur til bussruter mellom Norheimsund og Bergen. Turistbåtruta gjekk til Herand, og vidare gjekk det buss til fonna. Dette er ein utsiktstur utan isklatring, og han er berre tre–fire timar lang, fortel Bakke.

– Elles har me fått eit bra samarbeid med restauranten Fonna1199 ved skisenteret. Kundane våre kjøper lunsjpakke og middag der etter turen. Det har vorte svært godt motteke, seier Bakke.

Folgefonni Breførarølag har skipa til kajakkpadling på Hardangerfjorden og i Møsevatn i Rosendal saman med ein amerikansk turoperatør. Det har òg vore breføring langs den historiske vandreruta frå Sunndal til Odda. Alle desse turane har vore populære, fortel Bakke.

Tryggleiken framom alt

– Korleis tek de hand om risiko når de går på breen?

– Det er hovudoppgåva vår kvar einaste dag. Det er kjerneverksemda vår å vareta tryggleiken. Utstyret vårt er av topp kvalitet, og gaidane har den rette utdanninga og sertifiseringa. Breen endrar seg, og verksemda vår utfører risikoanalyse og tilpassar turane slik at dei er trygge. Tryggleiken trumfar alt. Punktum.

– Kva tilbakemeldingar har de fått?

– Me får stort sett gode tilbakemeldingar. Viss det er mykje regn, så får me kanskje høyra det, men vêret er ein del av breopplevinga. I det store og heile er det veldig positive tilbakemeldingar. For dei fleste er det å gå på breen ein unik, ny ting. Me prøver å formidla storheita og kjærleiken til landskapet me sjølve opplever på Folgefonna, seier Bakke.

Det er òg populært å leiga elsykkel på Juklafjord og sykla «Glacier Road» opp til breen.

– Det ser me aukande interesse for. Det er fint å oppleva turen frå fjord til fonn på eit sykkelsete, seier Bakke.

Kajakk- og sykkelturar har ofte utgangspunkt frå Juklafjord, kundesenteret til Folgefonni Breførarlag i Jondal sentrum.

– Særleg i juli, då det regna som verst, var det fint å kunna sitja inne tørt og godt og planleggja neste tur, gjerne over ein god kopp kaffi, seier Bakke.