Ny reknemåte råkar Tokagjelet
Skredpunktet Snaughaugtunnelen–Hansagjeltunnelen i Tokagjelet vert nedprioritert med ein ny skredfaktormodell.
Punktet fell frå 17.-plass til 196.-plass på den nasjonale lista over strekningar som treng skredsikring. Det kjem fram i ein høyringsuttale frå Vestland fylkeskommune om den nye skredfaktormodellen som Statens vegvesen har føreslege. Tokagjeltunnelen–Fossagjeltunnelen vil falla frå 21.-plass til 197.-plass.
Modellen var på høyring i haust, og saka var oppe i fylkesutvalet nyleg. Med ny skredfaktormodell kjem 6 av 7 strekningar med prioriterte skredsikringstiltak i Vestland langt ned på lista.
Ei strekning i Steinstøberget vert vel å merka flytta oppover, frå 242.-plass til 112.-plass. Årsaka til det kan vera ei feilregistrering i Norsk vegdatabank, skriv fylkeskommunen.
Kraftig protest
Sigrid Brattabø Handegard (Sp) presenterte på vegner av alle parti i fylkesutvalet eit fellesforslag om å protestera mot modellen. Utvalet meiner fylkeskommunen ikkje har vore nok involvert. Utvalet ser at den nye modellen fører til store endringar i dei prioriterte prosjekta i Vestland, og meiner at modellen er eit dårleg avgjerdsgrunnlag for dei farlegaste vegane. Politikarane peikar elles på at høyringsfristen var knapp.
Tokagjelet har i årevis stått øvst på den fylkeskommunale lista over strekningar som treng skredsikring.
Kva som skal vega tyngst og gje «høg skredfaktor», er endra i framlegget til ny modell. Dagens modell er basert på seks delfaktorar: skredfare, trafikkmengd, omkøyringstid, talet på stengingar per år på grunn av skred, talet på døger stengt per år på grunn av skredfare og fare for naboskred.
I framlegget til ny modell er faktorane skredrisiko, skredbreidd, trafikkmengd og omkøyring.
– Skredfrekvens er viktigast
Fylkesutvalet meiner skredfrekvens må telja mest. Dinest må årsdøgertrafikk og lang omkøyring eller inga omkøyring vega tungt.
Fylkesutvalet legg til grunn at prinsippet om at fylkeskommunane sjølve prioriterer fylkesvegprosjekt må gjelda.
Eit par steinar som dett ned i vegen frå bratte fjellsider, kan gjera minst like stor skade som eit breitt snøskred, påpeikar fylkesordførar Jon Askeland (Sp) i ei pressemelding.
Innbyggjarane i Vestland må leva med flest skredpunkt i heile landet, med skredfare sommar som vinter, påpeikar han. Med den føreslegne modellen kjem prioriterte og farlege skredpunkt i bygder i Vestland langt nede på lista.
– Det kan me ikkje akseptera, seier Askeland.
