Ny mast skal gje betre dekning
Ei 25 meter høg telemast i Aarhus-feltet skal gje betre mobildekning på Kvamskogen.
Søknaden frå ICE gjennom ansvarleg søkjar Tårnselskapet AS, med ei lita utstyrshytte ved foten, vert handsama av planutvalet 8. mai.
Rådmannen rår makthavarane til å dispensera frå arealføremålet friluftsområde i reguleringsplanen for både masta og ei lita utstyrshytte ved foten av henne.
Masta nær vegen Hjeltelia skal altså betra 5G-dekning for folk flest og ikkje minst betre dekning i naudssituasjonar. Plasseringa er vald ut frå radiotekniske analysar, ifylgje sakspapira.
Då tiltaket vart nabovarsla, kom fleire protestar – fleire av dei via advokat – frå seks grannar i området. Mellom sutene deira er estetikk, risiko for stråling, støy, dårlegare solforhold og verdiforringing. Rådmannen meiner, til liks med søkjaren, at samfunnsinteressene av betre mobildekning veg tyngre enn ymse ulemper i grannelaget.
