Ny «løvekatalog» er i postkassen

– Den eldre generasjonen smiler kanskje attkjennande, medan dei yngre undrar seg over kor lite me følgjer med i tida sidan me framleis lagar denne.Johannes Byrkjeland i Lions-klubben i Norheimsund meiner framleis den lokale katalogen har ein misjon utover at han er den desidert viktigaste inntektskjelda til dei lokale klubbane.Til dømes er det slett ikkje sikkert at ein finn alle telefonnummer gjennom dei mange opplysningstenestene på nettet. Ikkje alle varslar til dømes 1881 om endringar, eller kanskje dei lever i den tru at endringar i folkeregisteret vert automatisk oppdatert i katalogen. Dessutan har ein del reservert seg mot å stå i tenesta.

Ikkje feilfri

Byrkjeland påstår ikkje at den lokale katalogen er komplett og feilfri, men meiner han skal vera temmeleg oppdatert. Utgangspunktet er databasen til 1881 for Kvam per 1. desember 2019. Lions-medlemene i Norheimsund og Strandebarm har gått gjennom listene og retta alt dei har funne av feil og manglar ut frå kjennskap til vener, grannar og andre. Om lag sju hundre rettingar vart utførte.Likevel er det slik at ein del personar manglar, medan enkelte avlidne framleis står oppførte. Lions har prøvd å sjekka om fastnummer er i bruk og om adresser er korrekte, men alt er gjort manuelt, så menneskelege feil oppstår.

Frivillige og næringsliv

Katalogen inneheld, i tillegg til skuleruta og ei oppdatert liste med ymse hjelpetelefonnummer, ein eigen blå og ein eigen gul seksjon. På dei blå sidene finn ein eit oversyn over kommunale tenester, roller og kontaktinformasjon. Oversynet er betre enn det Kvam herad sjølv kan skilta med, opplyser Byrkjeland.På dei gule sidene finn ein bransjeregisteret, som inneheld eit oversyn over føretak fordelte på ei rekkje ulike bransjar. Denne delen, som ein ikkje lenger finn på nett, er særleg nyttig for nye kvemmingar som slit med å finna fram til ymse tenester. Den same gruppa kan dessutan ha glede av oversynet over frivillige lag og organisasjonar Også dette er monaleg meir omfattande enn det ein finn til dømes på den kommunale heimesida.Nokre sider fortel i ord og bilete om aktivitetar i Lions-klubbane i Strandebarm og Norheimsund dei to siste åra. Katalogen kjem nemleg ut annakvart år.

– Ta vare på den gamle

Byrkjeland oppmodar folk om å ta vare på den førre katalogen, for han kan vera eit nyttig supplement til den nye. Særleg ein del eldre har skrive opp sine eigne viktige telefonnummer i tabellen bakarst i boka, påpeikar han.Betaling for katalogen er frivillig. Byrkjeland fortel at då førre katalog vart send ut, betala om lag 30 prosent av mottakarane fakturaen som ligg inni han. Nytt av året er mogelegheita til å betala med Vipps. Katalogen inneheld dessutan ein del lysingar. Byrkjeland er takksam for annonsørstønaden.Før kvar katalog kjem ut, gjennomfører Lions ei teiknetevling på skulane. Ein vinnar får æra av å fjelga katalogframsida. Guro Honningsvåg Vik i 7. klasse på Øystese skule står bak løva som ynskjer kataloglesaren velkomen.Katalogen er trykt i 4.500 eksemplar og vert lagd i alle postkassar i Kvam. Byrkjeland har tru på at katalogen vil overleva i eit elles papirlaust samfunn.