Ny «løvebok» er på veg
Både namnet og ein del av innhaldet er nytt i den nye trykksaka frå Lions-klubbane i Norheimsund og Strandebarm.
I ei årrekkje har dei to klubbane gjeve ut bok annakvart år. Tidlegare var namnet «Lionskatalogen». I år er dette bytt ut med «Lionsboka».
Johannes Byrkjeland i Lions-klubben i Norheimsund fortel at mykje gamalt innhald er oppdatert i den nye utgåva. Samstundes har ein del nytt innhald kome til.
– Mellom anna inneheld boka eit bransjeregister der me prøver å fanga inn mangfaldet av verksemder som finst i Kvam. Ei slik oversikt finst berre i denne boka, fortel Byrkjeland.
Det er også laga oversikter over lag og organisasjonar i Kvam, og kven som er kontaktpersonar i desse.
Katalogen har ei avdeling med oversikt over strukturen i Kvam herad og kontaktinformasjon til mange av dei tilsette.
– Kvam herad har ei innhaldsrik heimeside, men det er ikkje alltid like lett å finna fram. Me trur vår oversikt er enklare, seier Byrkjeland.
Dei som trur alle telefonnummera står på 1881.no, tek ifølgje Byrkjeland feil.
– Me har brukt ei liste me har fått frå 1881, men har i tillegg oppdatert med om lag fem hundre nummer du ikkje finn der, fortel han.
Klubbane ønskjer også å heidra nobelprisvinnar Jon Fosse. Mellom anna er heile nobeltalen hans attgjeven i boka.
