Ny hage skapar trivsel på Pensjonisten i Ålvik
Det kan vera lønsamt å skriva søknader. Dei siste åra har tilskot frå Helsedirektoratet finansiert oppvarma fortau, nytt kjøkken, trimsykkel og sansehage i Ålvik.
Kvart år sidan 2012 har dei tilsette ved Ålvik trygde- og omsorgsbustader, på folkemunne kalla ”Pensjonisten”, søkt om tilskot frå Helsedirektoratet. Og kvart år har søknaden vorte innvilga.Birgit Grøtt er gruppeleiar for heimetenesta i Ålvik. Ho fortel at Pensjonisten har fått 1,5 millionar kroner gjennom ordninga. Pengane er brukte til ulike tiltak som skal betra kvardagen til bebuarane.
– Ein hage for sansane
Mellom anna er pengane nytta til å laga ein såkalla sansehage på nedsida av bustadane.– Tidlegare har ikkje området vore tilgjengeleg for dei som bur her. Me har brukt pengar på asfaltert gangveg med varmekablar. Det er også installert små lampar langs gangvegen. Dessutan er det planta ulike blomar og buskar som gjer at dei som går på gangvegen, kan sjå fargane og kjenna dufta frå blomane. Dermed kan dei som bur i bustadane, halda seg aktive og verta stimulerte utan å gå opp i den farlege hovudvegen, seier Grøtt.Hagen var ferdig i oktober. Grøtt fortel at tilsette og bebuarane gler seg til blomane og buskane byrjar bløma i vår.
Filmsykkel og nytt kjøkken
Pengane har mellom anna gått med til å leggja varmekablar i området kring bustadene, til å oppgradera kjøkkenet og til å kjøpa ein trimsykkel med fjernsynsskjerm. Skjermen vert brukt til å visa filmopptak som gjev inntrykk av at ein er ute og syklar. Film frå ulike stader i Ålvik er allereie på plass. Inkludert er også tilgang til eit stort videobibliotek som gjer at dei som har flytta til Ålvik, kan dra på ”sykkeltur” på heimstaden.Grøtt fortel at det er søkt om nye kroner i 2017. Om det vert løyvt meir pengar,m er planen å bruka desse på å laga ein uteplass nede ved sjøen.– Me som arbeider her, er stolte over at me har fått såpass store tilskot frå direktoratet. Me har fått gjort mykje for å betra livskvaliteten til dei som bur her i tider med stramme kommunale budsjett. Målet er at bebuarane skal bu heime så lenge som mogleg. Når ein har tilrettelagde dagakvititetar som dette, kan det gje avlasting for pårørande i ein krevjande omsorgssituasjon, seier Grøtt.
