Ny gjennomgang kostar pengar og tid
Eit forprosjekt knytt til ombygging av Øystese skule vart levert hausten 2022. No ber rådmannen om pengar til å sjå over det på nytt.
Etter at grovskissene av Øystese skule – teikna av arkitektverksemda Henning Larsen i Rambøll Group AS – var klare, har Kvam herad jobba vidare med utkastet. Det vil rådmannen halda fram med, med ekstern hjelp. Det kostar pengar. Rådmannen har bede heradsstyret om 500.000 kroner.
Rådmannen vil gjennomføra ein ekstern kontroll av skissene og skanna skulebygget for å kontrollera dei faktiske tilhøva opp mot teikningsgrunnlaget, skriv rådmannen i saksutgreiinga.
– Ei kvalitetssikring og optimalisering, seier teknisk sjef Lars Ese Ur.
HF har ikkje fått innsyn i reviderte planskisser, og ikkje i eit skriv frå rådmannen om status og framdrift i prosjektet. Avisa har klaga på avslaget.
Formannskapet tek stilling til den halve millionen i eit møte 7. mars. Heradsstyret avgjer saka 14. mars.
Kvar kvadrat kostar
Den halve millionen skal dekkja både kontroll av teikningane, skanning og prosjektleiing fram til politisk handsaming av saka. Den eksterne prosjektleiinga kjem i tillegg til prosjektleiarstillinga som vart lyst ut før jul. Arne Johan Heggland fekk jobben og byrjar i stillinga 1. april.
At skissene i forprosjektet gav for lite fleksibilitet i høve drift og endringar i elevtal, kom fram i eit formannskapsmøte i februar i fjor. Ur opplyste då at ein revisjon av forprosjektet ville verta naudsynt, men det viste seg å verta for dyrt å be arkitektane om å sjå på det på nytt.
Kvam herad sitt arbeid internt med medverknad og tilpassing av bygget har ført til ein auke i byggarealet. Kvar kvadratmeter kostar, og rådmannen meiner derfor at skissene bør kontrollerast eksternt før politisk handsaming og eventuell utlysing av konkurranse.
For lite fleksibelt
Ur sa i februar i fjor at det var skuleleiinga som hadde teke opp noko ho ynskte å sjå nærare på.
Innspela handla hovudsakleg om storleiken på klasseromma og talet på grupperom. Då HF på same tid spurde oppvekstsjef Astrid-Anett Steine om kvifor ikkje krava var melde inn frå byrjinga av, svara ho at det berre er nokre av romma som er litt mindre. Kvifor det ikkje vart teke omsyn til dette frå byrjinga av, visste ho ikkje.
Ur opplyste at bestillinga til arkitekten var at skulen skulle dimensjonerast for same elevtal som skulen har i dag, og at arkitekten nytta arealnormer frå Bergen kommune. Då nokre av klasseromma skulle plasserast innanfor veggane i eksisterande bygg, og det i tillegg skulle etablerast grupperom i tilknyting til desse, vart arealet knapt. Ved store elevkull vert det for lite fleksibelt, meiner han.
