Ny dagleg leiar i Visitfonna

Mjelde flytta frå finansbransjen i Bergen til reiselivsbransjen i Herand i 2019. Då overtok han og kona Kramsjø AS. No har han gjeve stillinga som dagleg leiar i Kramsjø vidare til dottera, Veslemøy Aarseth Mjelde, og byrjar i Visitfonna 1. august.

— Det blir interessant. Eg er audmjuk — både overfor staden og jobben. Det skal bli artig. Erfaringa mi handlar lite om svingteknikkar i bakken, men me lyt få dette i pluss. Det skal bli kjekt å koma i gang, seier Mjelde.

— Stort potensial

Den tidlegare finansanalytikaren ser fram til å prøva å vidareføra jobben som allereie er gjord. Mjelde er spesielt oppteken av Folgefonna som attraksjon, både for bygda og kommunen.

— Det er viktig at Folgefonna vert teken vare på på ein god måte. Fonna har store ringverknader for bygda, seier Mjelde.

I fyrste omgang er det snakk om eitt år i stillinga. Så får han og styret setja ein fot i bakken etter sesongen igjen. Han håpar at pandemien nærmar seg slutten, slik at han kan byrja å sjå på dei nye moglegheitene som då vil opna seg. Moglegheitene ser han for seg å setja i struktur i lag med reiselivsnæringa.

Ei av utfordringane er å gjera sommarskisenteret meir kjent, ikkje berre for alpinlag frå fjern og nær, men også for reiselivet og folk som bur i regionen.

— Det er overraskande mange som ikkje kjenner til Folgefonna, og ho er lite brukt av reiselivsnæringa som destinasjon. Der ligg eit stort potensial, seier Mjelde.

Stengjer sundag

Skisenteret stengjer for allmenta sundag 25. juli. For lag som allereie har tinga plass, prøver skisenteret å halda ope til litt ut i august.

Snøsmeltinga på breen har vore eit stort spørsmål og problem i lang tid, så å jobba vidare med å få på plass snøkanonar er høgt prioritert.

— Snøkanonar er einaste løysinga. Med dei vil me halda på snøen mykje lenger og også til dels preservera isen. Det er ei stor investering, men det hjelper totalt sett heile lokalmiljøet, seier Mjelde.

Prosjektet har vore i gang sidan 2019, men når og om det vert snøkanonar, er i andre si makt.

Måtte søkja på nytt

Visitfonna AS søkte i 2019 om seks millionar kroner frå næringsfondet i Jondal. Då valde plan- og driftsutvalet å ikkje løyva pengar, og vedtok i staden å be dåverande ordførar Jon Larsgard om snarast å kalla inn til eit møte med ordførar og næringssjef i Ullensvang kommune, dagleg leiar og representantar for aksjonærane i Visitfonna. Målet var å finna ein modell som kunne hjelpa Visitfonna med å få finansiert snøkanonane.

Då Jondal vart del av Ullensvang kommune, var Visitfonna nøydd å søkja på nytt. Det var ikkje verksemda klar over. Den 9. juli i år vart søknaden send. I søknaden til nærings- og strategifondet i Ullensvang kommune skriv dagleg leiar Michael Iversen at 2019 og 2021 har vore dei mest snøfattige åra på Folgefonna nokon gong.

Med snøkanonar meiner Visitfonna å kunna lengja sesongen med éin til to månader. Kostnadsramma er på åtte millionar kroner, og det er søkt om at Ullensvang kommune bidreg med éin million kroner. Søknaden vert truleg behandla i haust.

Noverande dagleg leiar Michael Iversen går vidare til Odda Digital System AS.