Ny dagleg leiar i badet
Med bakgrunn frå helse og omsorg er fysioterapeut Natalie Nisamjan klar for å styra Hardangerbadet inn i ei dynamisk framtid.
Kvemmingen er nemleg den nye daglege leiaren i Hardangerbadet AS.
– Det er ei litt anna stilling enn det eg er van med, så eg er litt spent. Men eg gler meg, seier ho.
Då HF prata med Nisamjan torsdag føremiddag, hadde ho berre hatt nokre få dagar i den nye stillinga. Dagane har vore lærerike og med mykje innhald, og det kjennest godt, fortel ho.
Den nytilsette kjem frå stillinga som fysioterapeut hjå Helse i Hardanger i etasjen over. Der har ho jobba sidan september 2021. Før det igjen var ho fysioterapeut og badevert hjå sin «nye» arbeidsgjevar.
Korona og pandemi var daglegdagse ord då Nisamjan sist var med på å planleggja drifta av badet. Planar vart lagde, men kunne ikkje gjennomførast, fortel ho. No håpar ho å få liv i dei.
– Eg ser potensial i badet, og tenkjer at dette vil eg vera med på å utvikla, seier kvemmingen.
Sjølv om Nisamjan har jobba i verksemda før, vedgår ho at det vert er ein del nytt å setja seg inn i, spesielt administrativt. Å finna ut kva folk ynskjer å få ut av badet, og å setja det ut i livet, er det ho gler seg mest til. Innspel frå innbyggjarar tek ho gledeleg imot.
Nisamjan tek over stillinga etter Anita Storemark. Storemark er ferdig i stillinga 1. januar, men ferierer frå og med 8. desember.
Dei store endringane vert det ikkje, trur Nisamjan. Fyrst og fremst vil ho halda fram med å ha fokus på vertskapet og på å vera synleg. Det skal vera eit bad for alle, seier ho.
