Ny dagleg leiar er tilsett
Ann Irene Eliassen Myrheim (56) er tilsett som ny dagleg leiar i Hardangerrådet.
Det opplyser Hardangerrådet IKS i ei pressemelding tysdag. Myrheim kjem frå Kalvåg i Bremanger og har leiarerfaring frå Bremanger kommune, der ho i dag jobbar med næring, eigedomsskatt og reiseliv. Myrheim har også erfaring frå Odda Næringsråd og Elkem-konsernet i Ålvik og Bremanger.
Den nytilsette leiaren er utdanna diplomøkonom og har tilleggsutdanning i sosiologi, industri og organisasjon. Kompetansen høver bra til Hardangerrådet sine fokusområde: politisk samordning, tenestesamarbeid og næringsutvikling, skriv styreleiar Jon Olav Heggseth i Hardangerrådet IKS.
Som ny dagleg leiar vil Myrheim vera svært sentral som koordinator mellom ordførarane og rådmennene i dei fire hardangerkommunane Ulvik, Ullensvang, Kvam og Eidfjord.
Myrheim tek til i stillinga etter nyttår, og vil ha kontorstad i Kinsarvik. Heggseth er glad for at mange kvalifiserte søkjarar melde seg, og ser fram til samarbeidet med Myrheim.
