NVE forlengjer snøskredvarslinga med to veker
Rekordmykje snø i Nord-Noreg og i fjellet i Sør-Noreg gjer at NVE forlengjer snøskredvarslinga med to veker, fram til 12. juni.
Mykje meir snø enn normalt og framleis vinterlege forhold med ustabil snø, er hovudgrunnen til at dei daglege snøskredvarsla fortset i ytterlegare fjorten dagar.
–Vi ser at behovet for å forlengje sesongen er spesielt stort i år og har vedteke å forlengje varslingssesongen, seier seksjonssjef Rune Engeset for snøskredvarslinga i Noregs vassdrags- og energidirektorat (NVE).
Artikkelen held fram under annonsen.
Ordninga omfattar dei 22 regionane på fastlandet, som normalt har dagleg varsling i perioden 1. desember til 31. mai. Varslinga på Svalbard blir avslutta som normalt 31. mai.
Engeset opplyser at NVE jobbar med å få observatørar og varslarar på plass for å kunne forlengje sesongen, og at dei òg ønskjer observasjonar frå andre på tur.
(©NPK)
