NRK: – Helse i Hardanger er valt bort
Helse Vest kjem ikkje til å kjøpa helsetenester av tilbydaren i Øystese.
Det skriv NRK Vestland. Dimed kan satsinga til Helse i Hardanger AS, som har gjeve eit intensivt behandlingstilbod til pasientar med mellom anna muskel- og skjelettplager, angst og koronaverknader, falla bort.
Helse Vest har valt ikkje å nytta rehabiliteringsplassane i Øystese neste år. Føretaket meiner at søknaden er svak på fleire felt og at han gjer det «vanskeleg å få eit heilskapleg bilete av korleis institusjonen vert driven», skriv NRK.
Styreleiar Stener Kvinnsland, tidlegare direktør i Helse Bergen, er ikkje nådig i omtalen av valet. Han ottast at tilbodet i Øystese kan forsvinna.
– Helse Vest si forvalting av offentlege midlar må då vera på grensa til ein helsepolitisk skandale, seier han til statskanalen.
– Dei har konkurrert på like vilkår med dei andre tilbydarane. Etter dei kriteria me har vektlagt, er dei vurderte til å ha eit dårlegare tilbod enn andre, seier fagdirektør Bjørn Erik Vikse i Helse Vest til NRK.
Ifylgje NRK meiner Helse i Hardanger at det er gjort sakshandsamingsfeil. Klage og rettssak kan vera aktuelt.
