NRK: Fann 800 år gammal ring i hagen

Det rapporterer NRK Vestland. Ringen, som no er teken hand om av ekspertar, ligg i ein seif på Universitetsmuseet i Bergen. Den er laga av gull og har ein smykkestein som enno ikkje er identifisert.

– Ringen er eit unikt funn. Det er særs sjeldan ein finn slike skattar, i alle fall utanom profesjonelle utgravingar, seier Gitte Hansen, som er professor i mellomalderarkeologi ved UiB til statskringkastaren.

Ho seier at ho håpar ringen kan gje meir kunnskap om livet på bygda i Noreg på 1200-talet. Dette er noko ein i dag ikkje veit så mykje om.

– Det meste me har, er frå byane. Ringen er som ein puslespelbit me kan bruka for å få eit meir fullstendig bilete, seier Hansen til NRK.