Nøyer seg med «god dialog»

Tinginga frå henne og fylkesutvalet i september var «ei politisk styringsgruppe mellom fylkeskommunen og vertskommunane» for å «sikra «nødvendig planframdrift» i dei to store skredsikringsprosjekta på fylkesveg 49 i Kvam og Ullensvang.

Så enkelt var det ikkje. Fylkesdirektøren rådde nemleg frå å oppretta gruppa. Han meiner at politikarane bør nøya seg med ordinære politiske prosessar etter plan- og bygningslova i planarbeidet.

Kjernen i argumenta mot gruppa var at politikarar og administrativt tilsette ikkje kan sitja saman i ei gruppe, utan at ho er formalisert som eit såkalla interkommunalt politisk råd med reglar for mellom anna møteavvikling og openheit. Om derimot administrasjonen ikkje skal delta, trengst ingen formalitetar og heller inga gruppe.

Seksjonsleiar i juridisk avdeling, Bertil Søfteland, slo i møtet i fylkesutvalet 26. november fast at initiativet frå Handegard kunne vera vanskeleg å plassera i nokon kategori.

Handegard undrar seg over at det skal vera eit problem å samarbeida, og viste til at ho har vore med på at kommunen, fylkeskommunen og vegstellet har arbeidd i lag med prosjekt.

– Føremålet er å snakka i lag. Om ein er sikra at det skjer utan eit kontaktutval, vil eg vera strålande nøgd. Det er ikkje eit poeng å laga mykje byråkrati, sa ho.

Enden på visa var eit nytt framlegg frå Sp, på førehand avklara med juridisk avdeling, om å ha «god dialog» mellom kommunane og fylkeskommunen for å sikra framdrift. Vidare føreslo partiet å be om ei sak om ei gruppe som kan lyfta og samordna politiske behov opp mot utviklingsstrategien som skal lagast for «armen» frå E134 til Bergen. Framlegget vart samrøystes vedteke.

I ordskiftet spurde Sigbjørn Framnes (Frp) Handegard om det er naudsynt med tiltak for å sikra framdrift i prosjekt, med tanke på at fleirtalskoalisjonen dagen før hadde sett av pengar til oppstart i 2025 og 2026.

– Erfaring har vist at det kan vera naudsynt, svara ho.