– Norsklæraren i meg bannar

Starten på journalistkarrieren har vore utfordrande og treg, om ein skal tru den nye bladfyken. Etter over sju år i læraryrket ofra han jobben som fast tilsett ved Norheimsund skule for eit vikariat i lokalavisa. For ein mann som set pris på faste rutinar og struktur, var det ikkje enkelt å ta valet.

– Til slutt tenkte eg at denne gongen må eg berre ta sjansen, seier Helgheim.

Det fyrste året som lærar hadde han i heimbygda, før han prøvde seg ved Garnes ungdomsskule i eitt år og flytta til Oslo og ein jobb ved Manglerud skole i fire år. Sommaren 2023 flytta han heim att til Norheimsund saman med kona, Elise Tvinnereim Otnes.

Når han ser tilbake på tida som lærar, er det gullkorna frå elevane han hugsar best.

– Ein gong var det ein elev som spurde meg om kva eg trur skjer om ein skotte med kilt hoppar i eit hoppeslott. Eg trur ikkje eg klarte å svara. Eg var for oppteken med å bita meg i leppa for ikkje å le, seier han.

Sjølv om Helgheim likte den varierte arbeidskvardagen, følte han at han ikkje fekk utvikla seg. Adjunkten utelukkar ikkje at han kjem til å gå attende til yrket, men trong ein pause. Mykje er bra, men også i læraryrket vert det stilt fleire og fleire krav som ein har mindre tid til å fylgja opp, seier Helgheim.

– Gode arveanlegg

Du har truleg sett namnet hans som byline i avisa fleire gonger. Allereie i sommar kontakta Helgheim HF. Berre nokre timar etter at meldinga var send, kom svaret om at han var velkomen til å prøva seg bak tastaturet i byrjinga av august. Helgheim fortel at han fekk ei innføring i journalistikk, og vart kasta ut i jobben. Utover hausten har han også hatt nokre helgeoppdrag.

Redaktør Sigbjørn Linga seier at han er glad for å få hjelp av Helgheim. Han skildrar det nye tilskotet som ein triveleg, høfleg, interessert og oppegåande ung mann.

– Det er kanskje ikkje så kjekt for skulane, men dess kjekkare for oss at me kan låna eller overta ein og annan lærar, seier Linga.

Bladstyraren seier at han visste at den nye journalisten har gode arveanlegg.

– Ikkje fordi dei er mine, men fordi eg har hatt gleda av å vera kollega med systera hans i nesten ti år. Så her ligg alt til rette for at han skal verta eit godt tilskot til staben.

Bratt læringskurve

Helgheim seier det er interessant å skriva om emne han ikkje har forkunnskap om. Prosessen med å finna ut ting, setja seg inn i saker og formidla synest han er spanande. 31-åringen gler seg til å skriva om ting som skjer i kommunen, helst om aktivitetar folk ikkje kjenner til.

Det er ein ting som gjev adjunkten kjensla av å sitja på skulebenken att.

– Når eg trur eg har jobba godt med ein tekst, og det er meir krusedullar enn tekst når eg får han tilbake etter korrekturlesing, får eg ein støkk, seier Helgheim.

Han er interessert og glad i språket, og set pris på å få konstruktive tilbakemeldingar.

– Eg har fått beskjed om at eg brukar for mange ord til å få fram poenget. Det som har overraska meg mest i rettingane, er at eg ikkje klarar å avgrensa bruken av bindeord. Orda lurer seg inn på stadar dei ikkje trengst. Då bannar norsklæraren i meg, seier han og ler.

Den nye journalisten seier at han har hatt ei bratt læringskurve når det gjeld fotografering.

– Det var heilt nytt for meg. I byrjinga var det mange dårlege, mørke bilete. Eg såg sjølv at eg hadde ein jobb å gjera der, seier han.

Likar hardrock

Når Helgheim ikkje er på jobb, går han ofte tur med blandingshunden Luna. Bladfyken likar å gå på konsert, trena eller driva med prosjekt i huset. Han sjekkar ofte telefonen for å finna ut kva fotballkampar som vert spelte, og han har oversikt over alt som skjer med favorittlaget Manchester United.

To–tre timar om dagen høyrer han på musikk. Favoritten er kvass elgitar og raske trommer, seier han. Han slappar av med hardrock.

I ordboka er sjangeren skildra som høg, aggressiv rock med vrengd gitarlyd, drivande trommer og ofte skrikande vokal.

– Avslappande?

– Kanskje ikkje avslappande, men det gjer meg glad.