Norheimsund kan få ny kinosal
Kvam herad ber om at ei gåve på fire millionar kroner frå Sparebankstiftinga Hardanger kan gå til ein kombinert sal i staden for ei storstove.
Det skriv samfunns- og utviklingssjef i Kvam herad, Jon Nedkvitne, til Sparebankstiftinga Hardanger.
Stiftinga har tidlegare løyvt pengar til ein storsal i den nye skulen, men det har ikkje late seg gjera å fullfinansiera salen.
Heradsstyret har vedteke å arbeida vidare med ein sal som skal byggjast til mellom anna kino, undervising, kulturskule og bibliotek. Han vert mindre enn det som var tenkt i byrjinga av prosjektet. Salen kan likevel nyttast til mange av dei opphavlege aktivitetane.
Fylkeskommunen vurderer eit auditorium for 60 elevar. Kvam herad ynskjer ein sal med 110—120 sitjeplassar. Det vert arbeidd for ein kombinasjon av desse føremåla.
Det er diskutert ei løysing der Kvam herad eig salen og Vestland fylkeskommune leiger areala i skuletida. Dersom dette vert løysinga, vil fylkeskommunen eiga fellesareala med ei form for motrekning av leigekostnader.
Kostnaden med kinosal med tilhøyrande utstyr er stipulert til 11 millionar kroner. Det vert arbeidd med ekstern finansiering av ein sal med inntil 120 sitjeplassar.
Kvam herad ber om at stiftinga vurderer å overføra pengane til det nye prosjektet, og om at det kan vera mogleg å søkja om meir pengar seinare.
