Noregs eldste mann er død

Det opplyser familien til HF.

Eide vart fødd i Tørvikbygd 3. juli i 1914, få dagar etter skota i Sarajevo som utløyste den fyrste verdskrigen. Han vaks opp på familiegarden på Eide, og tok etter kvart over drifta.

Mykje av tida har han nytta til å byggja båtar, slik faren og farfaren gjorde før han. Båtbygginga heldt han fram med lenge. Dei to siste båtane vart bygde etter at han hadde fylt 100 år. Etter kvart gjekk han over til mindre fysisk krevjande arbeid i form av skoskeiproduksjon.

På garden vart han buande til han var 108 år gamal. Den siste tida budde Eide på Tolo omsorg i Norheimsund, der han hadde verktøy på rommet og ifylgje familien laga skoskeier nær sagt heilt til det siste.

Eide etterlèt seg 6 born, 17 barneborn, 36 oldeborn og 1 tippoldebarn. Han har vore enkemann sidan 2002.

Les også:

Vilhelm Gravdal på Omastrand, som har hobbyforska på dei eldste blant oss, opplyser til HF at Eide vart landets eldste mann då Alf Oskar Olsen døydde 14. mars 2020. Men på Wikipedia vart han feilaktig utropa til landets eldste mann litt før det. Han var såleis landets eldste mann i nær fire år, opplyser han.

– Eide har i om lag eitt år og ti månader vore landets eldste person. Det vart han då Elsa Gundersen døydde 28. april 2022 etter å ha hatt denne tittelen éin dag. Vidar Eide var òg den siste personen i landet som var fødd før fyrste verdskrig, skriv Gravdal.

Så langt pålitelege registreringar rekk, vart Eide den fjerde eldste mannen gjennom tidene i Noreg, opplyser han.

Også dei to systrene til Eide nådde høg alder; Sigrid vart 95 år og Anna Ragnhild vart 100 år. Då HF snakka med barnebarnet hans, Vigleik Eide, i samband med ei bursdagsfeiring, uttala han at syskena har vore gode til ikkje å stressa seg gjennom livet. Klokka styrte dei ikkje, sa han.

– Dei gjorde det dei rakk den dagen, og det var ikkje noko stress med akkurat kva som måtte gjerast før dagen var ferdig. Det trur eg har vore god hjelp på veg mot den høge alderen. No stressar nok folk for mykje, meinte Vigleik.

Les også:

HF gjer merksam på at redaktør Sigbjørn Linga deler heim med eit av barneborna til Vidar Eide. Red.

I ein tidlegare versjon av denne saka skreiv HF at Eide truleg var den tredje eldste mannen i Noreg gjennom tidene. Det stemmer ikkje. Ifylgje Vilhelm Gravdal er Eide den fjerde eldste mannen i Norge gjennom tidene. Feilen vart retta 28. februar klokka 09.50.