Noreg skal gjenopnast i to etappar før sommaren

Når regjeringa torsdag vedtek og legg fram planen sin for korleis Noreg skal gjenopnast, vil tiltaka bli letta på i to hovudbolkar, får NTB opplyst.

Det tyder at éin bolk med lette vil kome om kort tid, noko som truleg tyder skuleopning for elevar frå 5.- til 10.-klasse rett over helga.

Samtidig vil regjeringa vente til ut i juni med den andre hovudbolken, etter det NTB forstår.

– Vi skal lage ein heilskapleg plan, som er ein tidsplan fram til sommaren der vi har ambisjonar om å opne mest mogleg, men med veldig tydelege smittevernråd, seier statsminister Erna Solberg (H) til NTB.

Ho viser til pressekonferansen på torsdag for fleire detaljar.

– Vi har jobba med å gjere det meir føreseieleg. Nokre endringar skjer raskt, men for andre tiltak er det greitt å få ein dato å halde seg til, seier Solberg.

Siste skuledag før sommarferien er 19. juni.

Lang liste

Solberg orienterte onsdag koronakomiteen på Stortinget om arbeidet i regjeringa, som tek sjølve avgjerda torsdag. I tillegg til ein heilskapleg plan for gjenopning er dette noko av det som er venta nærare tidfesta:

* Avklaringar rundt 17. mai-feiringa.

* Nye råd for kor mange som kan samlast heime og i parken. I dag er rådet maks fem personar.

* Ny informasjon om kva som skjer med elevane i 5.- til 10.-klasse og vidaregåande skular, som framleis er heime frå skulen.

* Avklaring om toppfotballen, barnefotball og annan kontaktidrett.

* Avklaringar rundt mogleg opning av underhaldningsparkar. Svar om treningssenter er òg venta denne veka.

* Avgjerd om utreiseforbodet for helsepersonell.

Klar åtvaring

Samtidig har Erna Solberg ei klar åtvaring til alle nordmenn som no gleder seg til utepils og 17.-maifrukost med vennegjengen og gjenopning av skular og idrettsaktivitetar:

– Viss folk ikkje klarer å halde seg i skinnet og følgje dei reglane som er sette opp, vil vi få smittetal og utvikling som går i feil retning. Då kan vi ikkje opne så mykje, seier ho.

Onsdag viste tal frå Folkehelseinstituttet at 62 personar var innlagde på sjukehus med koronaviruset, ein nedgang på ni siste døgnet. Samtidig er 20 pasientar i respirator, sju færre enn tysdag.

– Det aller viktigaste er at talet på nye smitta er lågt. Det skal ikkje så mykje til før ein får ei blomstring på enkelte område. Sjølv om vi opnar opp, kan det vere nokon stader lokalt ein må ta ned aktivitet fordi takta utviklar seg feil, seier Solberg.

– Vi har hatt eit par veker med veldig bra utvikling, og færre og færre som ligg på sjukehus. Folk blir sjølvsagt mindre tolmodige. Men dette er ei tolmodsprøve for alle saman.

To månader

Det var 12. mars at regjeringa innførte dei mest restriktive tiltaka i Noreg i fredstid. Stenginga vart sett på som tvingande nødvendig for å stanse spreiinga av koronaviruset.

Seinare har fleire av tiltaka gradvis vorte letta på. 20. april vart forbodet mot å overnatte på hytta fjerna og barnehagane gjenopna. Ei veke seinare følgde 1.–4. trinn på barneskulen etter.

Samtidig har ei rekkje yrkesgrupper, som frisørar og hudpleiarar, igjen kunna opne, føresett at ein tek omsyn til smittevern.

– Vi prioriterer sjølvsagt barn og unge og aktivitet der det er arbeidsplassar involverte. Men vi må gjere dette over tid og ikkje lage veldig stort smittepress på enkelte område veldig raskt, seier Solberg.

(©NPK)