Nordmenn storhandlar på Vinmonopolet

Vinmonopolet har omsett for like mykje som ei påskeveke, kvar veke sidan regjeringa sette i verk tiltaka. Men dei trur ikkje det betyr at nordmenn drikk meir.

Vanlegvis sel Vinmonopolet 1,6 millionar liter i veka, men dei siste vekene har dei selt 2 millionar liter eller meir. Det er like mykje som dei plar selje i påska, skriv E24.

Vinmonopolet trur likevel ikkje det betyr at nordmenn drikk meir enn dei plar gjere.

– Med ein gong grensene vart stengde, taxfree-salet gjekk ned, barar og restaurantar slutta å skjenke, har vi sett denne veksten. Den er ikkje overraskande stor når ein tenkjer på at dei andre kanalane er stengde, seier kommunikasjonssjef Jens Nordahl i Vinmonopolet til avisa.

I førre veke, veka rett før påska, tok salet seg endå meir opp. Då selde dei 2,6 millionar liter.

Det auka talet på omsetting har ikkje ført til overfylt butikkar. Vinmonopolet opplever at det er færre kundar, men at kvar enkelt handlar meir.

– Det ser ut til at folk har vorte flinkare til å planlegge, eller òg kjøpe for andre, for å unngå fleire handleturar. Det hjelper oss med å vareta smitteverntiltaka, seier Nordahl til E24.

Vinmonopolet har også sett at salet ved butikkane nær grensa har tatt seg opp. Salet der plar vanlegvis vere ganske lågt, men no er det likare det ein ser i butikkane rundt om i resten av landet.

(©NPK)