Nordmenn finn fram sin indre bonde i koronakrisa
Felleskjøpet melder om ein betydeleg salsvekst i butikkane sine den siste tida. Og det er kategorien hage og uterom som aukar mest.
– Dei siste fem vekene har vi ein salsvekst innanfor kategorien hage og uterom på 22 prosent samanlikna med same periode i 2019. Mykje tyder dermed på at mange nordmenn vel å bruke den nye kvardagen til å gå tilbake til røtene og finne fram sin indre bonde, seier Trond Fidje, direktør Detaljhandel Norden, i ei pressemelding.
Godt hjelpt av ein tidleg vår, heimepåske som følgje av hytterestriksjonar og rastlause nordmenn på heimekontor med betre tid, opplever Felleskjøpet altså ein sterk auke både i omsetning og kundestraum i butikkane sine rundt om i landet.
Artikkelen held fram under annonsen.
Også Felleskjøpets dotterselskap i Sverige, detaljhandelskjeda Granngården, kan vise til sterke salstal dei siste fem vekene, med ein vekst på 28 prosent innanfor hage samanlikna med fjoråret. I tillegg har både Felleskjøpet og Granngården nesten dobla netthandelomsetninga si.
(©NPK)
