Nordfjordingar skal byggje dagsturhytter i Hordaland

Verksemda Stad Kystbygg AS i Nordfjord har vunne anbodskonkurransen om bygging av 35 dagsturhytter i Hordaland. Dei første hyttene skal stå ferdige i september.

Dagsturhytter vart ein stor suksess då Sogn og Fjordane fylkeskommune starta prosjektet med ei hytte i kvar kommune. Over 300.000 personar har så langt besøkt dei 26 hyttene, og no skal Hordalands-delen av Vestland fylke få 35 tilsvarande hytter.

Jamn konkurranse

– Anbodskonkurransen var jamn heilt fram til målstreken. Vi har evaluert både tilbydd kompetanse, framdriftsplan, logistikkløysing og pris, og vi er sikre på at Stad Kystbygg AS vil levere både god kvalitet og god framdrift på denne kontrakten til ein verdi på over 30 millionar kroner, seier prosjektleiar og initiativtakar til hytteprosjektet Atle Skrede i Vestland fylkeskommune i ei pressemelding.

To firma deltok i anbodskonkurransen, og Stad Kystbygg i Nordfjord og Reknes Byggjevarer i Masfjorden konkurrerte om oppdraget. Reknes leverte dei 26 første hyttene, medan Stad Kystbygg no skal levere dei neste 35.

Hyttene skal byggjast inne i produksjonshallen på Leikanger på Stadlandet, og planen er å skipe hyttene sørover skipsleia når dei tre første hyttene er klare. Stad Kystbygg skal stå for både sjølve bygginga, transporten ut til kommunane og helikopterflyginga av hyttedelane til tomtene der hyttene skal monterast.

Alver først ut

Planen er å ha på plass 13 dagsturhytter før nyttår i år. Den første hytta skal byggjast og godkjennast i mai, og Alver vert første kommune ut. Kommunen skal ha tre hytter, som alle skal monterast i september. Deretter skal hyttene i Masfjorden, Fedje og Austrheim på plass.

Fysisk aktive vestlendingar

Dagsturhytteprosjektet er eit viktig bidrag til fylkeskommunen sitt mål om at alle i Vestland fylke skal ha moglegheit til å vere fysisk aktive kvar dag.

– Dagsturhytter i kvar kommune i Vestland er eit svært godt tiltak som underbyggjer visjonen fysisk aktivitet kvar dag. Dagsturhyttene kan også styrkje vestlandsidentiteten i alle dei 43 kommunane i fylket, der natur og naturopplevingar har vore viktig i både næring og rekreasjon gjennom fleire generasjonar. Vi må også nytte høvet til å rose kommunane for raskt og godt arbeid og politisk semje om dette prosjektet, seier Per Morten Ekerhovd, fylkesdirektør for kultur, idrett og inkludering.

Hyttene er eit samarbeid mellom fylkeskommunen, stiftinga i Sparebanken Sogn og Fjordane, dei aktuelle kommunane og spelemidlane til Norsk Tipping.