Nominerte Kvam til pris
Kvam ungdomsråd (KU) har nominert Kvam herad til å kjempa om tittelen årets ungdomskommune 2021.
Leiar Eusebiu Amanalachioai og nestleiar Sander Eide Aase sende nyleg inn søknaden til Barne-, ungdoms- og familiedirektoratet (Bufdir).
Rådet meiner heradet fortener prisen ikkje berre for innsatsen for born og unge det siste året, men for eit målretta arbeid over tid.
Unge i Kvam har vore heldige som har hatt ein kommune som har vore framtidsretta og har satsa på å involvera og inkludera ungdom og meiningane deira lenge før det vart lovpålagt, skriv leiarane.
Ungdomsrådet er i dag eit godt etablert, politisk organ som har som kjerneoppgåve å fremja interessene til born og ungdom og arbeida for å skapa eit best mogleg ungdomsmiljø i Kvam.
I 2012 vedtok heradsstyret å etablera Kvam familie- og læringssenter (KFL). Intensjonen var å bidra til betre samhandling mellom tenestene til barn og unge, og å styrkja kunnskap, kompetanse og godt tverrfagleg arbeid. I desember 2018 flytta tenestene inn i eit nytt bygg ved rådhuset.
Heradet har sett i verk mellom anna tverrfaglege team på skulane, utarbeidd ein rettleiar for førebygging og oppfølging av skulefråvær, etablert konsultasjonsteam for vald og overgrep, sett i verk samarbeid mellom ulike kommunale einingar og frivillige lag og organisasjonar knytt til arbeid mot barnefattigdom, oppretta tiltak som «Ferie for alle» og «Ung jobb» og gjennomført eit tverrfagleg prosjekt knytt til born og overvekt.
Kvam er òg pilotkommune innan Fritidskortet, som gjev ungdom tilskot til fritidsaktivitetar.
— Utekontakten i Kvam er ein kjemperessurs for oss ungdomar. Dei driv oppsøkjande arbeid retta mot oss ungdomar som bur og oppheld oss i Kvam, skriv KU-leiarane.
Utekontakten er òg representert i arbeidsgruppa til Ung Fritid. Ung Fritid er eit universelt tilbod, men der ein har mest fokus på dei borna og ungdomane som ikkje får oppleva så mykje i feriane. Her skipar ein til ei rekkje ulike aktivitetar.
KU samarbeider òg med Grannehjelpa.
— Me har ein kommune som satsar på barn og unge. Det skjer ved å vera nyskapande, målretta og inkluderande. I Kvam herad har ungdom ei eiga stemme som vert høyrd, skriv Amanalachioai og Aase.
