Nokon kjem til å få lyst på thaimat

Berre nokre lange steinkast frå barnedomsheimen til Jon Fosse, og nokre færre steinkast frå Fossehuset, helsar den fargerike matvogna bilistane frå plassen sin like ved fylkesveg 576.

Bak konseptet står Atitaya Boonmak og sambuaren hennar, Stein Helge Berge. Dei bur kloss i vegen. Prisen for plasseringa er trafikk nær husveggen, men som fylgje av matvogna kan trafikken i det minste brukast til noko matnyttig. Her sel Boonmak vårrullar og diverse klassiske ris-, biff-, kylling- og scampirettar frå Thailand både til forbipasserande som stoggar og til folk som ringjer og tingar hentemat.

Skifta kurs

Boonmak kom til Noreg i 2008. Ho har arbeidd i 13 år som snikkar og bygt vindaugo og dører på Frekhaug. Etter at ho trefte Berge for snart tre år sidan, fann dei etter kvart ut at dei skulle flytta saman i Strandebarm. Til saman har dei fire vaksne born frå tidlegare forhold.

Snikkarjobben var både tung og litt keisam i lengda, og Boonmak ville finna på noko anna. I Samnanger hjelpte ho ei veninne som dreiv matvogn. Sjølv hadde Boonmak røynsle frå både restaurantdrift i Thailand og frå arbeid på kjøkenet på ein sjukeheim i Austrheim.

Mannen hennar, som sjølv leverer tenester innan seismikk og i periodar er bortreist, fekk ideen om å starta eit matutsal ein dag paret køyrde forbi matvogna i Samnanger.

– Han spurde om eg likar å laga mat og selja. Eg sa «ja». Så laga eg mat til han. «Me må køyra på», sa han, fortel Boonmak.

Ein test med hundre vårrullar var ein suksess. Dei vart selde på to timar. Då voks trua på at forretningsideen hadde livets rett.

Roleg vinter

I juli i fjor flytta ho til Strandebarm, og i august henta paret matvogna, som vart kjøpt brukt og ferdig dekorert og innreidd på Hamar.

Planen var opphavleg å plassera matvogna i Strandebarmtunet i eitt år, men Kvam herad godtok maksimalt tre månader. Paret gjekk bort frå løysinga mellom anna for å spara leigekostnader og andreutgifter.

Heime i tunet ordnar alt dette seg, husleige finst ikkje, og Boonmak har kort veg til toalettfasilitetar i heimen. Faste kundar i bygda veit uansett kvar dei finn vogna, og mange andre ser henne enkelt når dei passerer på fylkesvegen, påpeikar ho.

Røynslene så langt er, kanskje ikkje så uventa, at trafikken er stor i sommarhalvåret og monaleg mindre om vinteren. I vinter har ho likevel hatt ope fem dagar i veka. Etterspurnaden har svinga veldig, og neste år reknar ho med å halda stengt om vinteren. Paret oppretta nyleg eit aksjeselskap, Berge Take Away AS, mellom anna for å gjera det mogeleg med permittering i rolegare periodar.

Driftig dame

Ein gong eller to i månaden reiser Boonmak til Bergen for å handla mat via ein butikk der ho via ei medlemsordning får gode prisar. I tillegg handlar ho mellom anna grønsaker lokalt i Kvam om lag ein gong i veka. Ho seier ho legg stor vekt på å behandla maten rett og å stetta alle hygienekrav Mattilsynet stiller.

Bror til Stein Helge, Håvard, kjem forbi under intervjuet. Han bur i etasjen over paret i den tidlegare verkstaden, som brørne kjøpte i lag i 2016 og pussa opp frå topp til tå. Fram til i fjor leigde dei ut til turistar, men så flytta båe brørne inn i huset.

– Ho er veldig flink til å stå på, seier han om Boonmak.

– Eg likar å styra meg sjølv og bestemma. Og eg likar å jobba! seier ho.