Noko kan koma til å skje

Viketunet Aktivitetslag etterlyste i sommar tilbakemelding på frå Ullensvang kommune på tidlegare brev om drift og vedlikehald av Viketunet i Jondal. Laget kan ikkje driva den tidlegare lensmannsgarden vidare utan at kommunen viser interesse for den kommunale eigedomen, skriv lagsleiar Lars-Arne Eide i eit brev til kommunen.

Tunet treng vedlikehald, men aktivitetslaget har ikkje pengar eller folk til å utføra det. Særleg det eine bygget, verkstaden, må takast tak i raskt.

Kultur- og idrettssjef Else Marie Sandal hadde møte med styret i aktivitetslaget 25. september. Målet var å få kunnskap om arbeidet i tunet og trongen for vøler og vedlikehald. Mellom anna treng løa og hovudhuset ny måling, og verkstaden treng reparasjon, ifylgje referatet.

Kommunen har ikkje eigne pengar i budsjettet til kommunale bygdetun, men kan bidra med pengar frå driftsbudsjettet til løpande vedlikehald. Større tiltak må handsamast politisk. Målet er å gjera Viketunet til del av ein kulturmiljøplan med eigne handlingsplanar.

I fyrste omgang vert Hardanger og Voss museum og eventuelt ein byggmeister spurde om råd om verkstaden. Sandal vil ta opp med kommuneleiinga om det er aktuelt å gje grønt lys for måling i vår eller sommar.