– Nøkkelen til frivillige
Grannehjelpa slit med å rekruttera ferske pensjonistar til frivillig innsats.
Det fekk avtroppande statsråd Kjersti Toppe (Sp) vita då ho vitja Kvam måndag 27. januar. Gjermund Stuve (Sp), ordførar Torgeir Næss (Ap) og dagleg leiar Siriann Lillevik i Grannehjelpa tok imot henne og reisefylgjet då gjestene kom inn i lokala til frivilligsentralen i Kvam.
Stuve skrytte av aktivitetane til Grannehjelpa. Han meiner frivillig arbeid kan vera ei av løysingane på utfordringane i samfunnet.
Artikkelen held fram under annonsen.
Frivillige rår
Lillevik presenterte arbeidet til Grannehjelpa. Ho påpeika at frivilligsentralen treng stønad for å eksistera. Den daglege leiaren skrytte av dei frivillige.
– Me har ei 85 år gamal dame som er turleiar og spring opp dei brattaste bakkane, sa Lillevik.
Den daglege leiaren fortalde om tiltaket «Hjelp ein sambygding». Ordninga eksisterer i Norheimsund, Øystese og Strandebarm. Tiltaket går ut på at ein gjeng med frivillige skriv telefonnummera sine på ei telefonliste. Dersom nokon ringjer til Grannehjelpa og ber om hjelp, kan Grannehjelpa kontakta dei frivillige på telefonlista og spørja om dei kan hjelpa til.
– Det tek ofte ikkje meir enn fem minutt før det har ordna seg, skrytte Lillevik.
Lillevik nemnda også«Måltidskompis», eit samarbeidsprosjekt mellom Grannehjelpa og Kvam herad. Det går ut på at frivillige skal reisa heim til eldre, som bur aleine, og dela eit måltid kvar 14. dag. Pleie og omsorg skal bidra med å informera om tilbodet, og oppgåva til Grannehjelpa er å finna frivillige til oppdraga, sa Lillevik.
– Dette er bra for den psykiske og fysiske helsa, sa ho.
– Ei gruppe er vanskeleg å rekruttera
Lillevik fortalde at Grannehjelpa har cirka 280 frivillige i «basen». Ho påpeika at mange av dei frivillige er eldre. Difor må Grannehjelpa rekruttera fleire.
Lillevik seier det har vore utfordrande å rekruttera dei som nyleg har vorte pensjonistar.
Artikkelen held fram under annonsen.
– Dei ynskjer ikkje å låsa seg til noko, fortalde den daglege leiaren.
Utfordringa til Grannehjelpa er å ha aktivitetar samstundes som dei frivillige ikkje kjenner seg pressa til å møta opp kvar veke, sa Lillevik.
Ein komité med frivillige skal finna ut korleis ein kan rekruttera dei som skal i gang med pensjonisttilværet, påpeika den daglege leiaren.
– Det du seier, er også ei nasjonal utfordring, sa Toppe.
Ho fortalde at statistikkar viser at folk svarar ja om ein spør om dei vil bidra med frivillig arbeid. Statsråden lurte på om det speglar seg i praksis.
Toppe meiner at Grannehjelpa tilbyr mange aktivitetar, og at det viser at mange frivillige er i sving i Kvam.
– Eg har trua på at de får dette til, sa statsråden.
Viktig med konkrete oppgåver
Lillevik fortalde at det er viktig å formidla konkrete arbeidsoppgåver til dei frivillige. Då er sjansen større for at nokon tek oppdraget.
Artikkelen held fram under annonsen.
– Om eg spør om nokon vil vera frivillig, kan eg få «nei» i retur. Dersom eg konkret spør om nokon kan køyra ein bil, får eg oftare eit «ja», sa Lillevik.
Styreleiar i Kvam Sp, Siv Håbrekke, meiner at oppgåva som koordinator for frivillige har vorte større, ettersom færre vil binda seg til faste tidspunkt.
Stuve slo fast at det er krevjande å organisera dei frivillige. Han framheva kor viktig det er at nokon tek på seg ansvaret som koordinator.
– Grannehjelpa er nøkkelen til å auka frivilligheita, samanfatta Stuve.
