No må bussen stoppa i vegen på Tolo

– Når eg skal stoppa for å plukka opp skuleborn her, risikerer eg at det kjem ein bil eller lastebil bakfrå som ikkje klarar å stoppa. Det er veldig farleg. Folk trykkjer på telefonane sine når dei køyrer, og det er då dei køyrer i ræva på bilen framføre, seier Torpe.

Han seier at trafikksituasjonen er kompleks frå før. Kantstoppet er plassert like ved krysset mellom Tolohagen og fylkesveg 79. I tillegg er det eit heva gangfelt, og avkøyrsla til Rema 1000 berre nokre meter lenger borte.

– Når du kjem frå Tolohagen i vest og skal svinga ut på fylkesvegen, har du ikkje tilstrekkeleg sikt om det står ein buss i vegen, seier Torpe.

– Dårleg løysing

Han er oppteken av nullvisjonen Stortinget vedtok i 2002. Visjonen seier at ikkje nokon skal verta drepen eller hardt skadd i trafikken. Torpe undrast over kven visjonen skal verna.

– No er det dei mjuke trafikantane som er i fokus. Er skadar på mjuke trafikantar verre enn på personane som sit inne i bilane? Om ein bil kjem i 50 og køyrer inn i baken på ein buss, er sjansen liten til å koma uskadd frå det, seier Torpe.

Ifylgje Torpe er kantstopp dårlegare eigna på Tolo enn i bygater. Han seier at det er mykje tungtrafikk på vegen og at trafikken fylgjer fartsgrensene. Løysinga er dårleg fordi trafikkbiletet er ei blanding av lokale trafikantar og gjennomgangstrafikk, meiner han.

Transportøkonomisk institutt (TØI) publiserte i 2019 ein artikkel med resultat frå ein studie av effekten av haldeplassar og trafikktryggleik. Studien finn ingen systematisk forskjell i risiko mellom dei to måtane å forma busshaldeplassar på, heiter det i artikkelen. Det er fleire ulukker per buss, innanfor 60 meter frå haldeplassen, for kantstopp enn for busslommer. Fleire av desse ulukkene er registrerte som ulukker i kryss. Det kan tyda på at mange av konfliktsituasjonane skuldast krysset, og ikkje utforminga, heiter det i artikkelen. Studien fann heller ikkje støtte for hypotesen om at det er fleire møteulukker ved kantstopp enn busslommer.

– Kan skapa utfordringar

Anita Solberg, områdeleiar for Hardanger og Voss i Tide Buss AS, skriv i ein e-post til HF at kantstoppet fungerer fint for bussen og passasjerane isolert sett. Ho ser utfordringar knytt til at stoppet ligg på ein veg med høg trafikk og eit vegkryss like ved. Dette fryktar ho kan medføra at bilistar køyrer forbi utan å ha tilstrekkeleg sikt, når bussar stoppar for å ta på eller sleppa av passasjerar.

Solberg opplyser at bussjåførane er opptekne av at det skal vera trygt for alle som ferdast i trafikken. Ho oppmodar alle om å visa stor aktsemd i trafikken for å unngå farlege situasjonar.

Då HF tok bilete av busstoppet 24. september, venta Jorunn Neteland på bussen. Ho hadde ikkje studert busstoppet før ho vart gjord merksam på endringa.

– Sånn skal det vel ikkje vera. Det er litt trongt og dårleg plass her. Kanskje dei skal utvida? spør ho.

– Hadde ikkje venteareal

Men det er ikkje planen til Vestland fylkeskommune. Daniel Melve Kvarme, fagskuleingeniør i avdelinga for infrastruktur og veg i fylkeskommunen, skriv i ein e-post til HF at den gamle busslomma ikkje hadde venteareal for mjuke trafikantar. Kvarme forklarer at bussreisande måtte venta og stiga av og på frå gang- og sykkelvegen, som òg er tilkomst for bustader.

Han skriv at gang- og sykkelvegen og tilkomsten til bustadene no vert skilde frå ventearealet til bussen. Busspassasjerar får eige venteareal og slepp å gå på og av i køyrebanen, skriv Kvarme.

Torpe meiner problemet kunne vore løyst ved å flytta vegen til bustadane lenger bak, slik at det hadde blitt nok plass til både veg, ventesone og busslomme. Han meiner mange av endringane i kryss og langs vegen i Norheimsund, har gjort tryggleiken dårlegare.

– Det vert brukt store summar på endringar som fører til at trafikken vert hindra og trafikktryggleiken redusert. Kvifor skal alt gjerast så vanskeleg når det fungerte bra som det var? spør Torpe.

– Ei trygg løysing

Kvarme opplyser at kantstopp er det beste alternativet, på grunn av lite tilgjengeleg areal. Det er i samsvar med vegnormalen for veg- og gateutforming, skriv han. I normalen står det at haldeplassar skal formast som kantstopp eller busslomme. Ifylgje vegnormalen skal plattforma ved kantstopp vera slik at passasjerane kan venta utanfor køyrebanen.

– Kantstoppet vart tilrådd etter ein trafikktryggleiksinspeksjon fylkeskommunen gjennomførte. Då vart det totale trafikkbiletet vurdert. Løysinga er prosjektert i samråd med Skyss. Skiltforholda på staden er gode, og me vurderer kantstopp som ei trygg løysing på den aktuelle staden, skriv Kvarme.

Les også: