No kjem vêrskiftet – varslar plussgrader i heile landet

– No får vi ei omlegging til mildvêr i store delar av landet, seier vakthavande meteorolog Unni Nilsen ved Meteorologisk institutt til NTB.

Den siste tida har det vore kaldt i store delar av Noreg. Dei næraste dagane vil varmluft som kjem frå sør og sørvest, breie seg aust og nordover og føre til at det blir plussgrader dei aller fleste stadene, bortsett frå på høgfjellet.

I dei sørlegaste fylka kjem det også nedbør.

– Det blir eit ganske tydeleg vêrskifte, i alle fall i Sør-Noreg. Der har det vore sol og kaldt i fleire dagar no, men i morgon skyer det til, og frå natt til fredag kjem det nedbør. Det blir ei veldig stor omlegging, seier Nilsen.

Opp i ti grader i Bergen

Det er særleg Vestlandet som får dei høgaste temperaturane dei neste dagane, truleg mellom fem og ti grader.

– Til dømes i Bergen kan det kanskje komme opp mot ti grader dei neste dagane, seier Nilsen.

Samtidig vil det komme ein god del regn.

– Det blir også aukande vind med opptil liten storm på vestlandskysten. Det blir gradvis meir vind i heile landet, men det er berre på Vestlandet det kan bli storm, seier Nilsen.

Tåke, vind og regn

På Sør- og Austlandet kjem det skyer og nedbør torsdag ettermiddag og kveld. Truleg startar nedbøren som sludd.

– Det kan også bli tåke, og etter kvart går det over til regn og nokre få plussgrader. Samtidig blir det aukande vind, og det kan nok bli kuling somme stader på Sør- og Austlandet. Temperaturen gjennom helga og måndag vil halde seg på plussida, truleg mellom null og fem grader på Austlandet, og noko høgare på Sørlandet, seier Nilsen.

Frå Trøndelag og nordover vil det ikkje komme like mykje nedbør som i sør, men det kan komme litt også der.

– Det kjem nok litt lett regn eller slutt i overgangen frå torsdag til fredag i Trøndelag, men etter det går det mot opplett. Frå torsdag kveld blir det også plussgrader, og det kan nok bli rundt åtte grader i Trondheims-området i helga, seier Nilsen.

Kjem med vårbeskjed

I Nord-Noreg blir det noko av det same vêrbiletet som i Trøndelag.

– Akkurat no er det rundt null grader mange stader i nord. Torsdag og fredag kan temperaturen variere, for det er først frå fredag at varmlufta frå sør kjem nordover. Då stig temperaturen, og det kan bli snakk om seks–sju grader i Nordland, seier Nilsen.

Det kan også komme litt regn, men ikkje like mykje som i sør.

– Lengst nord vil nok temperaturen liggje på minussida fram til laurdag ettermiddag. Då kjem varmlufta inn også der, og det blir lett nedbør, seier meteorologen.

Trass plussgradene i heile landet dei næraste dagane, meiner meteorolog Unni Nilsen at det er for tidleg å seie at våren er på veg.

– Blir det ti grader, så er jo det litt vårleg, og det vil kjennast mykje varmare enn det har vore. Samtidig kan vi ikkje seie at våren har komme heilt endå, for viss ein ser litt vidare utover i neste veke, er tendensen at temperaturen går litt ned igjen, seier ho.

(©NTB)