No kan du ta utdanning i Hardanger
Styret til Høgskulen på Vestlandet bestemte at det vert mogleg å ta barnehagelærarutdanning i Hardanger- og Voss-regionen frå hausten 2025.
Det opplyser prosjektleiar for Hardanger, Voss og Kvinnherad Studiesenter, Sofie Torlei Olsen, i ei pressemelding.
Studiesenteret er eit prosjektsamarbeid mellom Hardanger og Voss Næringshage AS, Næringshagen i Ullensvang AS og Kvinnherad Næringsservice. Målet er å leggja til rette for desentralisert utdanning, basert på etterspurnad etter kompetanse i lokalt og regionalt arbeidsliv, ifylgje nettstaden.
– Dette er ein gledesdag! Hardanger, Voss og Kvinnherad Studiesenter har vore ein pådrivar for å få barnehageutdanning til regionen vår i fleire år, seier Olsen i pressemeldinga.
Ho seier at hovudmålgruppa er vaksne personar som allereie jobbar i barnehagar eller andre sektorar. Utdanninga skal gå over fire år og vera ein kombinasjon av nettundervising og samlingar i Eidfjord, Kvam, Kvinnherad, Ulvik, Ullensvang og Voss. Kvart semester skal ha tre tre dagar lange samlingar, ifylgje pressemeldinga.
For at det skal verta noko av utdanninga, må minst 30 studentar visa interesse. Kommunane skal sjølve rekruttera studentar frå eigne rekkjer, men også dei som ikkje jobbar i dei seks kommunane, er velkomne til å søkja, vert det opplyst. Olsen opplyser at det er ein stadig auke i talet på dispensasjonar til bruk av ufaglært arbeidskraft, og at det er vanskelegare å rekruttera faglærte i distrikta.
– Det viktigaste for oss har vore å sikra at utdanninga vert tilbydd i vår region. Dei som har vurdert etter- og vidareutdanning, må nytta høvet, seier Olsen i pressemeldinga.
