No går vêret tilbake til normalen

Etter ein start på veka med varme og fint vêr i nord og fossregn i Sør-Noreg, går haustvêret no tilbake til normalen: Vått i vest og nord, tørt i sør og aust.

Den siste veka er det sett nedbørsrekordar for oktober fleire stader i Sør-Noreg, medan det er sett varmerekordar i Nord-Noreg.

Det er ikkje slik det pleier å vere, seier vakthavande meteorolog Pernille Borander i Meteorologisk institutt til NTB.

No går vêret meir mot det som er typisk for ein oktobermånad i Noreg.

– Det starta veldig vått på Austlandet og Sørlandet denne veka, medan det var veldig varmt i Nord-Noreg. I resten av veka og helga blir det heller Vestlandet og Nord-Noreg som får litt regn, medan det stort sett er på den tørre sida på Austlandet og Sørlandet, seier ho.

Mildare luftmassar på veg

Austlandet og Sørlandet ligg stort sett i le for nedbør, men det kan komme ein og annan drope dei neste dagane.

Samtidig er det mildare luftmassar på veg, og denne landsdelen vil truleg oppleve litt høgare temperaturar enn vanleg for oktober.

– Spesielt i Telemark kan det bli opp mot 16–17 grader torsdag, seier Borander.

Ho seier temperaturen stort sett vil halde seg rundt 15–16 grader til og med helga.

Våtare vêr

På Vestlandet blir det meir av det vestlendingane er vande med på denne tida av året: Av og på med vind og regn.

– Det ser ut til å bli ganske jamt vått dei neste dagane, men det er ikkje meir enn det vestlendingane kan tole. Dei er jo vande til mykje, seier Borander.

På den gledelege sida blir det venta høgare temperaturar enn vanleg, særleg i Møre og Romsdal der det kjem sørleg vind.

– Her ser temperaturane ut til å bli liggjande rundt 16 grader dei neste dagane. Laurdagen og søndagen blir endå varmare, då kan vi få litt føn-effekt i Møre og Romsdal, og temperaturen kan fort bikke 16 grader, seier Borander.

– Men det blir òg vått, strekar ho under.

Farevarsel om snø i nord

Lenger nord blir det òg av og på med nedbør. I Trøndelag vil temperaturane liggje rundt 14–15 grader på det meste, og det kjem eit blaff av nordleg vind torsdag.

Endå lenger nord går det òg over til normalt haustvêr.

– Det blir ei litt grå avslutning på veka, som starta ganske fin og varm, seier Borander.

I tillegg til vind og regn er temperaturane venta å falle ned under ti grader i Troms og Finnmark, og til så vidt over ti grader i Nordland. Torsdag kan bli spesielt kjølig, og meteorologane har sett seg nøydde til å sende ut farevarsel om snø på fjellovergangane i Salten og Ofoten.

– Seint torsdag ettermiddag og torsdag kveld kan det komme snø over 500 meters høgd som kan leggje seg på fjellovergangane i området, seier Borander.

Også i Troms og Finnmark kan det bli kjølig, og i verste fall kan nedbøren komme som sludd torsdag.

– Her bør ein tenkje på om bilen er skodd rett, følgje med på vêrvarselet og køyre etter forholda, seier Borander.

Kaldare neste veke

Temperaturar opp mot 16 grader er ikkje vanleg for oktober, og frå og med neste veke vil òg Sør- og Austlandet kjenne meir på typiske hausttemperaturar.

– Det blir betydeleg kjøligare, og ein vil merke temperaturendringa etter helga. Ikkje fullt så mykje i Nord-Noreg, men nordavinden kjem og gjer det kjøligare, seier Borander.

Elles vil det typiske haustvêret halde fram i starten av neste veke.

– Vest og nord får nedbør, medan det blir heller kanskje litt finare og meir sol på Austlandet og Sørlandet, spår meteorologen.

(©NPK)