Fleire er sende til sjukehus etter ATV-ulukke i Øystese

Sju born og to vaksne var innblanda i ein ATV-velt på Kjosås laurdag.

To luftambulansar kom til staden, der ein ATV som det sat ni personar på, hadde velta og rulla ned ein skrånande bakke.

Politiet opplyser rett etter klokka 14 at to vaksne og eitt barn vert behandla på staden. Alle var medvitne. Dei involverte borna er i alderen 3–10 år, opplyser operasjonsleiar Bjarte Rebord i ei pressemelding frå Vest politidistrikt.

Politioverbetjent Ann-May Garen ved lensmannskontoret i Kvam, Samnanger og Tysnes opplyser til HF på staden at ei vaksen kvinne og eitt barn skal fraktast til Haukeland universitetssjukehus med luftambulanse. Ei anna kvinne skal fraktast til Haukeland med ambulanse.

Dei andre borna som sat på køyretøyet då det velta, fekk tilsyn på staden og vart sende til sjekk på den lokale legevakta.

I tillegg til to luftambulansar og eitt redningshelikopter rykte brann- og redningstenesta, politiet og fleire ambulansar ut.

Politiet har enn så lenge ikkje slått fast kva som er årsaka til ulukka.

– Det er førebels tidleg i etterforskinga. Me har prioritert livreddande arbeid og har difor ikkje avhøyrt dei involverte, seier Garen.

Politiet oppretter sak.

Lege på staden kan ikkje opplysa HF om helsetilstanden til dei skadde.