Nest best i landet

Utanom jobben som røyrleggjarlærling er det stort sett bowling som står på timeplanen hjå Melstveit. Med eigen nøkkel til bowlinghallen kan han trena akkurat når det passar han.

— Det vert nokre timar i bowlinghallen. Eg er i hallen tre til fire gongar i løpet av veka, og prøver å få tid til ein treningsdag i helga òg, seier Melstveit.

Han byrja med bowling i 2013, og er no mellom dei beste bowlarane under 21 år i Noreg. I fjor vart han beste spelar i Bergen bowlingkrins.

— Dette er stort

Det var 23 deltakarar frå heile landet med i noregsmeisterskapen for juniorar. Sundag var dei seks att i finalen. Tevlinga føregjekk i Molde, og familien var med som heiagjeng. Klubbmedlemer i Kvam fylgde spent med på direktesendinga på nett.

— Han låg litt bakpå i starten, men klarte å henta seg opp att. Han er heilt fantastisk. Dette er utruleg stort for oss!

Det seier Terje Høysæther, dagleg leiar i Kvam Bowlingklubb. Han har nok av lovord om ungdomen, og trur ikkje det er lenge til Melstveit er med på landslaget.

— Me set pris på å ha han med i klubben. Han kunne valt å byta til ein større klubb i Bergen, men han har valt å bli hjå oss. Det er veldig kjekt, seier Høysæther.

Små detaljar

Melstveit har trena til tevlinga i fleire månader. Medan andre har vore ute i sola, har Melstveit vore på bowlingbanen. Bowlingsesongen går frå hausten til våren, og sommaren er tida for terping på tekniske øvingar og på å treffa spesifikke kjegler.

Å verta nest best i NM er han svært nøgd med. Det er mange tilpassingar som må gjerast før eit kast, og nye og vanskelege baneforhold er utfordrande. Val av kule, rotasjon og ballfart må vera perfekt. Ifylgje Melstveit vil folk som vanlegvis spelar til 210 poeng, spela rundar på 180 og 190 når forholda er slik som dei var i Molde.

— Kva er vanskelege baneforhold i bowling?

— Banen er oftast enten tørr eller glatt. Der me spela no, var det fyrst tørt, og så vart det glattare. Det gjer det vanskeleg å gjera dei rette tilpassingane og gjera det bra over tid, seier Melstveit.

Snart senior

I oktober fyller talentet 18 år, så den komande sesongen er den siste som junior. Målet er å koma med på landslaget før han vert senior. Då gjeld det å gjera det godt i konkurransar. Neste konkurranse er U21-NM i Haugesund i september.

I juni fekk Melstveit tildelt stipend frå Sparebankstiftinga Hardanger. Det kjem godt med i det komande året. Pengane går med til reising og oppgradering av utstyr.

— Kva er det vanskelegaste i bowling?

— Å kasta jamt. Du klarar ikkje å vinna turneringar utan, seier Melstveit.