– Nektar å spela i Norheimsund

Det kom fram i eit brev ei gruppe foreldre sende til Kvam herad førre vinter. Dei skreiv at anlegget er uhygienisk og prega av vond lukt. Låsane på dørene fungerer i periodar ikkje. Fleire jentelag nektar å bruka anlegget i samband med trening og kamp. Tilreisande lag reagerer også på tilhøva, og klubben er flau over å visa fram fasilitetane.

– Ikkje stolt

Odin Johan Fonneland er ein av styremedlemene i Norheimsund Fotballklubb, som har ansvar for klubbhuset.

– Me er ikkje akkurat stolte over garderobane og toaletta. Anlegget er svært gamalt og utdatert. I tillegg er det dårleg isolert. Klubben brukar store summar på oppvarming, utan at det vert akseptabel temperatur. Bygget er så skralt at det ikkje gjev meining å prøva å pussa det opp. Det må rivast og byggjast nytt, seier han.

– Fryktar de at det skal gå ut over rekrutteringa?

– Det vil iallfall ikkje fremja rekrutteringa.

Kvam herad eig klubbhuset, medan fotballklubben driv det. Klubben har fått årleg eit driftstilskot på 20.000 kroner til idrettshuset. Det held ifølgje Fonneland knapt nok til å betala reinhaldet.

Skal utviklast

Planane om å utvikla heile Haugamyr og byggja nytt garderobeanlegg er ifølgje Fonneland ei av årsakene til at ting har vorte som dei har vorte.

– Planane gjer at korkje heradet eller klubben ønskjer å gjennomføra kostbare utbetringar av eit bygg som uansett skal rivast, seier han.

Fotballklubben har fleire enn fire hundre medlemer som brukar garderoben og toaletta. I tillegg nyttar både barneskulen og barnehagar anlegget på dagtid.

– Området er ein samlingsplass for unge. Eg tykkjer det er viktig at området har eit velfungerande garderobe med toalettbygg, seier Fonneland.

– Tilbyr overgangsløysing

Leiar for forvalting, drift og bygg i Kvam herad, Stein Rykkje, er samd i at det ikkje nyttar å pussa opp bygget.

– Garderoben og toaletta ligg i ei gamal tyskarbrakke. Den vart bygd rett på bakken, utan fundament. Dette er ikkje noko å ta vare på. Det er berre å riva og byggja nytt, seier han.

Politikarane har løyvt pengar til å setja opp ei mellombels toalettbrakke på Haugamyr. Vona til Rykkje var i vinter å få henne klar i mai. Søknaden vart send frå Kvam herad 25. oktober. Tre dagar seinare var byggjeløyvet i boks.

– Når brakka er klar, kan me stengja toaletta. Heradet vil også tilby klubben å nytta garderobane i idrettshallen i Norheimsund i ein overgangsperiode. Går klubben med på det, kan me stengja også garderobane, seier Rykkje.

Når eit nytt garderobeanlegg kan vera på plass, vågar han ikkje å spå om.