Nei til «vikarpool»

Det var i ein interpellasjon til heradsstyremøtet 7. november Bjarte Helland (INP) tok til orde for å sjå nærare på ei slik ordning. Helland hevda at mange ynskjer å flytta heim, men at mangelen på fulle stillingar set ein stoppar mellom anna for huslån. Dessutan er det utfordrande å skaffa vikarar på fleire felt, meiner han, som sjølv har fartstid frå sjøfart. I den bransjen fungerer ordninga bra, sa han, så kvifor ikkje tilsetja folk i heile stillingar i ein vikarpool med fleksibel arbeidsplass?

Støtta uroa

Håvard Gjerde (R) stilte seg bak INP. Gjerde kunne tenkt seg ei grundig utgreiing basert på erfaringar frå andre kommunar. Han minte òg om at saka var aktuell då partia gjekk til val i 2019. Då vart politikarane, ifylgje han, bedne om å venta til ulike reformer og omleggingar var gjennomførte.

– Det er ei viktig sak, og eg har eigentleg trudd at den stadig var under oppfylging, sa Gjerde.

HR-sjef Kari Sagen fortalde at rådmannen deler uroa, men at det er komplekst. Ho vil heller jobba med dei prosjekta som allereie er i gang med deltid, arbeidsorganisering og arbeidskraft. Dei tiltaka er meir tilpassa behovet til heradet, og vil treffa betre for ein organisasjon på storleik med Kvam, meiner administrasjonen.

– Ikkje eit mål

Gjermund Stuve (Sp) er samd i målet om mest mogleg heile stillingar, men meiner at administrasjonen har nok å gjera med budsjettarbeid, og at saka uansett ikkje kjem til å verta jobba med med det fyrste.

Ordførar Torgeir Næss (Ap) poengterte at vikarpool er eit verkemiddel, ikkje eit mål i seg sjølv. Sidan 2019 har ting har endra seg, og det er i dag vanskeleg nok å få tak i folk til ledige stillingar. Han minte òg om at andre verkemiddel, til dømes auka grunnbemanning, allereie er sette i verk.

Også Frp sa seg nøgd med utgreiinga til administrasjonen. Partiet kjenner seg trygg på at det vert teke tak i problema, sa Gry Kyrkjeeide (Frp).

Framlegget vart nedstemt mot tre stemmer frå SV, INP og R.