– Nei til permanent oppdrettslager
Lingalaks AS bør ikkje få halda fram lagringa av utstyr ved Horggjona, meiner rådmannen.
Ho tilrår planutvalet å avslå søknaden om dispensasjon frå kommuneplanen for permanent bruk av eit område i sjøen til lagring av ymse oppdrettsutstyr. Utstyret har allereie vore lagra i ni år utan formell avklaring.
Mellom argumenta for dispensasjonen er at det vil vera dyrt og arealkrevjande å lagra utstyret på land. Søkjaren meiner det ikkje finst andre eigna område i sjøen.
Fleire høyringsinstansar har uttrykt skepsis. Det same har to grannar på land. Den eine meiner at dispensasjonen i alle fall bør vera tidsavgrensa.
Rådmannen meiner ein dispensasjon vil setja kommuneplanen som styringsverktøy vesentleg til sides. Akvakulturområdet ved Horggjona vart fjerna i planen i 2019, etter innspel frå nettopp Lingalaks. Ho viser elles til at Kystverket ottast konflikt med hovudleia i fjorden, og fryktar at saka kan skapa presedens slik at andre nedlagde anlegg vert gjorde om til lager.
Dersom politikarane vil spela på lag med søkjaren og vil dispensera, bør dei etter rådmannens syn krevja at lageret ikkje vert nytta til utrangerte konstruksjonar som ikkje skal nyttast i produksjon.
Planutvalet drøftar saka tysdag 20. september.
