Negativ til nedklassifisering
— Vegen til Fitjadalen bør vera eit kommunalt ansvar.
Det meiner Øystese Grendeutval. Vegen er mykje nytta av ålmenta, skriv utvalet i høyringa av framlegget om nedklassifisering og privatisering av kommunale vegar.
Ikkje berre dei med fritidsbustader har nytte av vegen, påpeikar utvalet. Fitjadalen er utgangspunkt for eit stort turområde, også for tilreisande frå andre kommunar, og betyr mykje for reiselivet. Skulane og barnehagane nyttar området, og rørslehemma kan bruka vegen, skriv utvalet i innspelet. Også aktivitetar i Øystese jeger- og fiskarlag vert nemnde, pluss skeising på isen.
Området har moglegheiter for turar også om vinteren. Desse er populære og eit nytt element i reiselivet. Det er difor behov for at vegen vert brøyta om vinteren, skriv utvalet.
Kvam har satsa mykje på reiseliv og turisme. Difor er det viktig at det er enkelt å koma seg til området, meiner utvalet. Når ein skal handsama vegsaka, bør ein tenkja framover og vurdera kva nytte Kvam har av vegen, ifylgje innspelet.
— Ein kan ikkje lata kostnadene med brøyting styra. Her vekslar det frå år til år etter kva vêrgudane bestemmer, skriv leiar Kristi Opsanger.
