Naturvernarar og oppdrettar går saman om ordskifte
Naturvernforbundet og Lingalaks AS er tradisjonelt motpolar i debatten om oppdrett. No slår dei kreftene saman.
Onsdag 30. oktober arrangerer Naturvernforbundet i Hardanger, saman med oppdrettsselskapet Lingalaks, eit ope møte om oppdrett på Hardanger fartøyvernsenter.
Der skal partane, i lag med representantar for Havforskningsinstituttet og forskingsinstituttet NORCE, presentera utviklinga til Hardangerfjorden i lys av tilførte næringsstoff frå oppdrett.
– Ikkje noko frieri
Naturvernforbundet i Hardanger tok initiativ til møtet, fortel leiar Klaus Rasmussen.
– Me vil ikkje gjere frontane steilare enn dei treng vera, men dette er absolutt ikkje noko frieri til oppdrettsnæringa, seier han.
Fellesmøtet er ein måte å møtast og utveksla synspunkt på. Det er naudsynt, for oppdrettsnæringa er komen for å bli, seier Rasmussen.
Men ein kan ikkje fortsetje som før. Fjorden er i fare, hevdar Rasmussen. I invitasjonen til møtet står det at ein ser for mange teikn på at fjorden ikkje er like rein som han burde ha vore.
Statsforvaltaren i Vestland meiner at pilene peikar feil veg for fjorden. Rasmussen fryktar at Hardangerfjorden kan verta livlaus.
– Det ligg i korta at noko må gjerast. Om ein skal halda fram med oppdrett, må ein ta grep. Me kan ikkje fortsetje som no. Det forstår også oppdrettarane, seier han.
Rasmussen meiner at Lingalaks har spennande ting på gang, men at bransjen generelt er treg med å gjennomføra endringar.
– Lurt å snakka
Styreleiar og eigar Erlend Haugarvoll i Lingalaks seier at oppdrettaren og Naturvernforbundet har hatt ulike former og format på dialogen opp gjennom åra. Forbundet har vist interesse for å høyra direkte kva Lingalaks held på med. Partane vart samde om at det kanskje finst fleire som kan vera interesserte i å høyra på presentasjonar og meiningsbryting.
– Her vert det ope for å koma med det ein vil, heilt usensurert, seier han.
Haugarvoll seier at det ikkje alltid er boikott og forbod som er måten å føra verda framover på. Han trur det kan vera med på å motivera oppdrettsbransjen til utvikling om argumenta vert lytta til båe vegar.
– Det er lurt å snakka saman, seier han.
Vona hans var å få både Mattilsynet og Statsforvaltaren i Vestland til å delta, men båe takka nei til invitasjonen. Ordstyrar for kvelden vert Lars R. Djupevåg.
