Nattarbeid for montørar
To transformatorar ved Steine og Dalatun i Steinsdalen vart råka av lynnedslag om lag klokka 15 onsdag.
Det var ikkje nokon eksplosjon, men dei kortslutta internt, opplyser administrerande direktør i Kvam Energi Nett AS (KEN), Arne Tillung.
Eit arbeidslag på sju personar arbeidde frå onsdag ettermiddag til tidleg morgon torsdag med å skifta ut trafoane.
KEN har trafoar i sitt beredskapsmateriell, fortel Tillung. Dei kostar frå 100.000 kroner og oppover. I tillegg kjem arbeidstimane.
Same kveld fekk verksemda melding om at det var feil på ei kraftline ved Heradstveitvegen i Tørvikbygd. Denne vart òg utbetra, og ein er no tilbake til normal forsyning att.
Det viktigaste er at KEN får retta feila så snart ein kan og få tilbake straumen til abonnentane, seier Tillung. Han hadde ute seks montørar og ein ingeniør. Nokre var ferdige klokka tre om natta, andre klokka fem. Tillung rosar dei tilsette for å rykkja villig ut og gjera godt arbeid.
Direktøren oppmodar elles folk om å melda frå dersom dei manglar straum.
