Nasjonale turistvegar treng nye formgivarar
Statens vegvesen ønskjer no å inngå avtalar med arkitektar og landskapsarkitektar til å forme ut framtidige turistvegattraksjonar.
Utviklinga av attraksjonar langs dei nasjonale turistvegane våre har gått føre seg i snart tre tiår med i alt 175 realiserte prosjekt ved utgangen av 2022. Så langt har eit 50-tals formgivarar delteke i arbeidet.
No leitar Vegvesenet etter nye formgivarar til prosjekt som blir planlagde gjennomført i perioden 2023–2029. Prosjekta ligg spreidde over heile landet og omfattar alt frå mindre stoppestadar og utsiktspunkt til rasteplassar med servicebygg.
Formålet med innkjøpet er å inngå rammeavtalar med eit utval av arkitektane og landskapsarkitektane i ein ny generasjon.
For å bli innlemma som leverandør i rammeavtalen er det eit krav om at formgivaren har kontor med base i Noreg, og dessutan ikkje tidlegare har delteke i utforming av turistvegprosjekt.
(©NPK)
